SEGRE
Ús torístic en Vielha

Ús torístic en VielhaSEGRE

Creado:

Actualizado:

Se parle fòrça dera regulacion des lotjaments d’ús torístic, fòrça interessant. Mès, era question de hons que s’aprovaue, en darrèr Plen der Ajuntament, non ère era sua regulacion, vos an enganhat. Aquerò que s’aprovaue ère era limitacion d’un dret que coma ciutadans auem ena nòsta propietat privada. Entà entene’c, er Alcalde Serrano pretenie dar era potestat d’auer licéncia de lotjament torístic, entà poder logar e trèir un capitau e rendibilitat economica, as viuendes unifamiliars, ei a díder as cases granes (rendes superiores as 300.000

€) e suprimie aguest dret as propietaris d’apartaments, pisi, estudis e demés (era grana majoria). E aguesta a estat era nòsta denúncia e era nòsta oposicion, coma tanben era deth còsso de govèrn que non votec a favor der Alcalde. Açò ena Euròpa deth sègle XXI non ei possible. Coma oposicion, en Ajuntament, non seram jamès complices dera discriminacion sociau e de classes. E non ac digui jo, ac diden es mès grani experts d’Espanha en un informe dera “Comisión Nacional del Mercado de la Competencia”.

Era justificacion, dera regulacion, ei eth prètz deth loguèr que puje. Me podetz díder guaires viuendes sociaus o entà trebalhadors a impulsat er Ajuntament enes darrèrs tres ans? Vos ac digui jo, Cap! E aquerò està provocant, tanben, qu’eth prètz puje entà toti (sustot entà es que viuem e trebalham en municipi pendent tot er an). Les hèrem ua prepausa entà redusir eth prètz deth loguèr ath torn deth 10%, aquerò òc ei justícia entà toti, non an hèt arren.

Per tant, que non vos enganhen! Es drets son de toti e es oportunitats tanben. Cau regular, nosati ac volem, tamb justícia e un model de societat just entà toti e totes. Sense discriminacions ne distincion de classes.

tracking