In England

Per dusau viatge m’escapi entà melhorar era lengua inglesa. Eth prumèr siguec entà Dundee (Escòcia), dejà hè dotze ans d’aquerò, ara m’e escapat tà Bournemouth (Inglaterra). Ath delà der aprenentage der inglès, sò aprofitant entà melhorar es mès coneishements sus era globalitzacion.

Vos e de confessar qu’era individualitzacion dera que parle Ulrich Beck e era modernitat liquida que definís Zygmund Bauman, son ua realitat. E agut era oportunitat de parlar-ne tamb inglesi natius e dejà an ua conceptualitzacion dera societat globau completament diferenta. En canvi se parles tamb persones vengudes entà Bournemouth, de d’auti païsi, per motius de trebalh e sustot se an família, es diferéncies son reaument estonantes entre eri.

Un sistèma educatiu focalitzat a hèr grana ara persona (ego), en tot deishar de costat e sense accès ar aprenentage d’aqueth element que la hènt vertaderament , “eth coneishement”. Un sistèma laborau que “guetitze”, un sistèma de salut que non prioritze ena prevencion, un sistèma d’òci que convide a depèn quines conductes e consums en totes es capes dera societat, un concèpte dera cultura completament insustanciau son quauqui des exemples. Tamb es teachers, e pogut parlar deth Brexit, coma en tota societat n’i a d’un costat e der aute, mès sò que mès m’a sorprès ei, era vision qu’an dera governança dera Union Europea. Totaument negativa.

Auem diferéncies substanciaus enes pilars der estat deth benèster. Per méter un exemple, un an d’estudis universitaris en Inglaterra a un còst de 10.300 € (sonque matricula) qu’era majoria dera joenessa demane en prèstec. Se vietz a trebalhar ena osteleria vos pagaràn d’inici, eth mínim 8,50€/ora (1.356 €/mes). Tanben, i a fòrça causes positives e que m’encanten. Evitem çò de pitjor e conservem sò de melhor.