SEGRE
Aran ei amenaçat

Aran ei amenaçatSEGRE

Creat:

Actualitzat:

Eth Conselh de Ministres a aprovat er estudi informatiu dera N-230 en sòn tram Boca Nòrd deth Tunel de Vielha enquiara termièra francesa. Un estudi qu’a quate alternatives. Sincerament cap d’eres ei positiva entà Aran. Mès n’i a ua, era alternativa quate, que se resulte era escuelhuda peth Ministèri provocarà era “mòrt” (lenta e rapida) d’Aran coma la vedem e viuem auè en dia.

Aguesta alternativa, trinque eth País e le dividís en dues parts fòrça diferenciades. Ua part, des de Betren enquià Baqueira e ua dusaua, des de Betren enquiara termièra francesa. E vos demanaratz perquè la trinque? Donques perquè ara nautada de Betren se construsís un viaducte tamb ua nautada de mès de 50 metres e ua longitud de 335 m qu’amassarà era actuau N-230 tamb un nau traçat que passarà peth solan de Vielha enquiath crotze de Betlan, peth dejós de Vilac. Aquerò aurà uns efectes economics, sociaus e paisatgístics demoledors entara aufèrta toristica integrau.

A partir deth crotze de Betlan era “naua” N-230 non aurà cap canvi respecte ath traçat actuau. Ua animalada! Per qué? Donques perquè eth volum de transpòrt pesat que passarà per Aubèrt, Bossòst e Les cada dia se multiplicarà quasi per tres. Se ara passen 550 camions diaris, arribaràn a passar-ne lèu 1.200. Es conseqüéncies seràn terribles. E, perquè? Donques perque es tunels d’escales aumentaràn era sua nautada actuau, en tot passar de 4,5 m enquiàs 5,5 m. Aquerò provocarà daurir eth pas a quinsevolh camion que ara non pòt passar en un èish tant dirècte e internacionau. Ua mòrt lenta.

Peth contrari, a niveu miei ambientau, paisatgístic, de conservacion e de patrimòni naturau e culturau era “mòrt” serà rapida. Cau rebrembar que des der an 2002, es institocions araneses an ua prepausa alternativa, tà jo era melhor. Luitem-la!

tracking