SEGRE
‘Barcelona sense aigua’

‘Barcelona sense aigua’SEGRE

Creat:

Actualitzat:

Aguesta madeisha semana La Vanguardia publicaue un article tamb un titolar fòrça sensacionalista “eth Pirinèu demore sense nhèu”. Sò segur que beth dia publicaràn, o non, un article que diderà “Barcelona demore sense aigua”, contunhi demorant a vèir se le publiquen.

Sò de mès important, d’aguest article, ei que i a dades e estudis, que se constaten tamb realitats, que mos obliguen ara reflexion, ath debat e ara accion tamb guardada longa e generosa. Mès, entà èster sincers non depèn de nosati, exclusivament. Nosati podem arribar a on podem arribar. Es mès nautes administracions an era mès grana responsabilitat tamb eth canvi climàtic e es sòns efectes negatius.

Quan acabè de liéger er article de Antonio Cerrillo (La Vanguardia) constatè er extasi dera ipocresia periodistica ei, sò que didem en Aran, “tirar era pèira e amagar era man”. ¿Perquè non demane a cap responsable dera Generalitat de Catalonha o der Estat Espanhòu que demoren hèr entara subsisténcia dera economia deth Pirinèu e Aranesa deuant des efectes adversi deth canvi climàtic? ¿A previst era Generalitat o er Estat un plan d’accion entà minimitzar es efectes negatius deth canvi climàtic que proclame aguest article? En compdes d’alarmar, er article poderie ajudar-mos a guanhar complicitats, mès alavetz non le liejaríen, ei melhor auer “likes”.

Sonque rebrembar as “savis e urbanites de Barcelona” qu’aguest territòri, eth Pirinèu, l’auem conservat nosati (sègles d’istòria) e le protegim nosati (i viuem tot er an) perquè ei casa nòsta. Refrescar-les era memòria, as grani “savis” dera metropolis, que enquià hè ben pòc temps non sabíen ne que existíem. Sabetz quan ac sabèren? Quan entad eri, eth nòste País e eth Pirinèu, se convertíc en un divertimento. Sonque les demani coheréncia e respecte quan parlen de nosati!!!

tracking