“Nòde” públic-privat

Enes darrèrs ans fòrça païsi dejà an legislat entà crear “sandbox” o, sò de madeish, “banc de pròves”.

Aguesta creacion auvedís ath besonh de crear projèctes experimentaus e innovadors que sajen de crear productes e servicis mès enlà des velocitats qu’era legislacion ordinària obligue, qu’en cas des administracions publiques en Estat Espanhòu dejà sabem e patim. Tostemp en un encastre que garantisque era seguretat juridica.

Eth creishement, era acceleracion e es canvis qu’era tecnologia à produsit e çò que produsirà, en miei e long tèrme, transformarà es relacions humans-maquines, humans-humans e maquines-maquines. Serà ua disrupcion tamb un impacte, sense precedents ena istòria dera umanitat, que non deisharà indiferent ad arres.

En Aran, entà adaptar-mos-i, ath delà d’exigir era implementacion d’estructures tecnologiques auançades (era fibra optica en toti es pòbles e començar a trebalhar entà non perder eth tren dera 5G), auríem d’exigir crear un “banc de pròves públic-privat” que permete crear, experimentar e liderar, projectes público-privats sense pòu ath possible èxit o fracàs. Fin finau, non equivocar-se ei eth signe mès evident qu’eth ritme d’innovacion e decision ei fòrça baish.

Eth valor deth coneishement que pogam captar, eth talent que pogam arténher o retièr, es dades que pogam gestionar e reutilitzar e era experiéncia positiva de materialitzar accions concretes, que comportarà era innovacion que se prepause, mos permeterà daurir naui sectors estrategics, naues oportunitats economiques e laboraus e naui coneishements entath desvolopament deth País, ath delà de retroalimentar e ajudar ara activitat economica e estrategica que dejà existís. Dejà auríem era base d’un projècte de futur e de País.