Ua carta entà Aran

Se liegem es tres indicadors economics mès subergessents, ath delà der impacte qu’estam patint pera crisi sanitària, començam a vèir era debacle economica qu’auem en Aran. A finaus deth mes de març i auie inscrites 305 persones en caumatge, s’auien tramitat 209 expedients de regulacion temporau d’ocupacion (ERTO o ERTE) en tot afectar a 830 persones e mès de 1.000 autònoms s’an vist abocadi ara paralitzacion totau dera sua activitat. Situacion qu’afecte ara economia personau e familiar de mès deth 40% dera poblacion en nòste País. Es donades d’abriu non ajudaràn a melhorar, er ostiu serà fòrça difícil e arres pòt assegurar, a dia d’auè, coma serà era tardor e eth pròplèu iuèrn.

Auer mès de miei País ath deuant d’ua situacion tan dura e difícila obligue a èster ara nautada des urgéncies personaus, familiars, laboraus, economiques e sociaus. Hèsqui ua crida ara solidaritat, ara humilitat e ara generositat, ua crida a toti parlen era lengua que parlen e agen neishut a on agen neishut. A arribat eth moment zero, eth moment de trebalhar toti amassa tamb dus objectius prioritaris: prumèr, trebalhar entà gestionar era inmediatesa en tot èster ath costat des persones e families mès vulnerables e afectades pendent tot aguest an; e dusau, dessenhar un modèu economic e productiu a cuert, miei e long termini que mos permete visualitzar naues oportunitats. Abantes ac hèren es nòsti pairs-sénhers, dempús es nòsti pairs. Ara mos tòque a nosati. Les ac deuem as mès petits, ara joenessa e ath nòste País.