SEGRE
Trail Molières

Trail MolièresSEGRE

Creat:

Actualitzat:

Mentre mos disposam a recéber ua naua etapa deth Tour de França, sauvam en rebrembe recent era viuença dera corsa de Vielha-Molières, exigenta e arribenta, damb 4.100 mètres de desnivèu positiu e tanplan ben organizada e senhalizada. Ara que lèu lèu tot ei correderes, aguesta, coma era maraton de Montlude, era corsa de Baish Aran, destaque tanben pera beresa der entorn e eth contrast entre es paratges vèrds e atlantics dera sèrra de Montcorbison, Letassi, Montpius e Coma Salies enquiara calhauèra que comence a hèr-se lòc a compdar deth barranc des Pois, ath pè deth sòn Malh altiu, tanben aperat Forcanada, e ei estienuda d’aquiu ençà en tot eth recorrut mès aupin. Nauèth en açò dera corredera, era corsa permet de trauessar era nòsta val enquiath sòn tet, eth tuc de Molières, que compartim damb era val vesia de Benàs, aperat aquiu Mulleres, atau coma de, maugrat era prèssa competitiva, contemplar es bèri paisatges granitics des Maladetes. Era baishada deth Molières, damb un capinaut Aneto (o Neto), tet pirenènc, peth coret rocós que da accès ara sua val, ei seguida pes atents corredors e corredores, esbalausidi peth respècte deth mant de nhèu, a on ja an deishat esclau es capdauantèrs Miguel e Marc, aguest valent damb ua tustarrada que le dèishe dehòra de jòc. Era nhèu mos acompanhe lèu lèu enquiath refugi, per còstes impossibles de transitar a pè. Era mielhor opcion qu’ei méter eth cu en tèrra e arturar-se enquia díder pro, en aguest tram mès aventurèr. Demore era longa baishada pera val omonima enquia Conangles e d’aquiu mos calerà enfilar eth pòrt de Vielha tà arténher dejà eth caplòc d’aguesta val referenta tanben ena practica der espòrt ar aire liure, o outdoor, que sòne mès pòstmodèrn.

tracking