Baqueira iniciarà eth 3 de juriòl era sason d’ostieu damb naues rotes tà BTT

Baqueira Beret daurís es sues pòrtes aguest ostiu, deth 3 de juriòl enquiath 31 d’agost, damb ua ampla prepausa d’activitats ar aire liure entà toti es publics. Era estacion met en foncionament es remontadèrs Clòt der Os e Bosque, en tot facilitar er accès a rotes de senderisme e BTT, includint naues ampliacions des populars flow trails Tortuga e Telesèra, ideaus tà familhes e ciclistes de toti es nivèus.

Coma nauetat, era app oficiau de Baqueira aufrís informacion practica sus rotes e activitats, e era centrau de resèrves permet organizar lotjament e aventures de forma simpla e ath milhor prètz. Es tarifes son flexibles, damb forfaits diadèrs e de sason autant entà senderisme coma entà BTT. Eth Baqueiraticket de passeig còste 20 € entàs adults e 15 € entara mainadèra, mentre que tàs practicants de BTT eth prètz ei de 30 € entàs adults e 20 € entara mainadèra. Tanben ei possible aquerir un forfait de sason d’ostieu per 180€ (adults) e 120 € (mainadèra).

Era aufèrta se complète damb activitats coma rafting, barranquisme, circuits d’aventura, passegi a shivau e ua variada gastronomia de montanha. Eth Otèl Montarto, renovat, serà er epicentre deth descans actiu, e eth calendari d’eveniments includís pròves esportives coma era HOKA Val d’Aran by UTMB e era Vielha Cycling Tour. Era creishenta demanda de bicicletes electriques e de carretèra a impulsat tanben servicis especializadi, damb era possibilidad de compdar damb guida. Destaque tanben era creacion deth sagèth ÒC Bikefriendly, damb un totau de 34 lotjaments e 22 enterpreses actuauments, premanides entath ciclotorisme damb servicis especifics.