Grison, de La Revuelta, inície es Dimenges en familha de Bagergue
Er artista e collaborador de La Revuelta de RTVE, Grison (Marcos Martínez) inaugure deman eth cicle Dimenges en familha, qu’aufrís quate espectacles gratuïts que combinen musica, umor, circ, magia e teatre visuau. Toti eri se hestejaràn en espaci public deth nuclèu de Bagergue, tostemp entàs 18 ores e ar aire liure s’era meteorologia ac permet. Eth cicle, impulsat per prumèr viatge en 2022, s’a assolidat coma ua cita destacada d’ostiu dera Val.
“Volem apropar era cultura, sustot as petiti pòbles”, expliquèc eth president dera EMD de Bagergue, Marc Tarrau.
Ath delà de Grison, actuaràn Improvisto’s damb eth sòn Beat Box Circ (10 d’agost); Toni Zamora damb Live Performance (17 d’agost) e era Companhia Anna Confetti damb A la fresca (24 d’agost). Eth cicle ei organizat pera EMD de Bagergue e compde damb era collaboracion der Ajuntament de Naut Aran, era Deputacion, er Institut d’Estudis Ilerdencs e eth Departament de Cultura dera Generalitat.
