“Eth major rèpte tar aranés ei potenciar eth sòn usatge sociau”

Ath delà d’èster era portavotz de Convergéncia Aranesa en Conselh Generau d’Aran, Rosa Maria Salgueiro ei tanben vicepresidenta der Institut d’Estudis Aranesi, era acadèmia dera lengua que se dedique ara normativizacion der aranés. Aguest ahèr a favor dera promocion dera lengua pròpria d’Aran tanben la desvolòpe cada quinze dies enes pagines de SEGRE a trauès dera sua colomna d’opinion. En lèu dus ans de collaboracion a publicat 99 articles, era màger part des quaus se remassen ara en un libre recopilatòri titolat dera madeisha manèra qu’eth sòn espaci en aguest diari: Mots, e que lèu se presentarà en Lhèida.

“Quan m’ac prepausèren pensè: Qué harè?”, coheisse Salgueiro, que hig que lèu tostemp escriu sus experiéncies quotidianes o sus “quauquarren relacionat damb çò qu’a passat ena Val d’Aran. Aplecs que se hestegen era Val, pèces de teatre, o pròves esportives que se hèn ath long d’aqueri dies e ac relacioni damb er usatge der aranés”. Ath delà, se mòstre arregraïda damb era responsa des lectors. “Diden que les agrade perqué mòstren çò que viuem” en Aran. En aguest sens, Ròsa Maria Salgueiro rebrembre damb grana fermesa que “eth major rèpte der aranés ei potenciar eth sòn usatge sociau”. Er Institut d’Estudis Aranesi, afirme, “hè eth trabalh que le correspon entara normativizacion dera lengua, mès er usatge sociau ei çò de mès complicat, perquè èm en un lòc de pas a on i a fòrça torisme que ven en iuèrn e dempús marche”. E hig: “ena escòla s’aprèn er aranés des 3 enquias 16 ans. Ei a díder, es mainatges lo saben. Mès se vas peth carrèr çò que se parle ei eth castelhan, pr’amor que i a fòrça gent de dehòra”. Entà cambià’c, opine Salgueiro, “s’a de lutar” entà incrementar er usatge der aranés, mès “non sonque des dera Acadèmia”, senon tanben, damb campanhes qu’involucren a ciutadans e enterpreses.