Er ajuntament de Naut Aran regule es pisi toristics sense lèu limitar-les

Er Ajuntament de Naut Aran premanís ua regulacion des pisi toristics, mès sense lèu limitar-les. Ac harà a trauès d'un cambi ena sua planificacion urbanistica qu'arrecebec era aprobacion iniciau en Plen deth passat 18 de junh, damb es vòts a favor deth govèrn de CA, era abstencion d'UA e eth refús d'Aran Amassa. Eth document, que se sosmet ara a informacion publica, autorize ar usatge d’abitatges coma lotjament entà toristes ena practica totalitat de pòbles deth municipi, damb sonque era excepcion dera zòna de Plau d'Arties. Aquiu, era normativa urbanistica establís ja limitacions qu'ac empedissen. Aguesta regulacion non vò limitar es pisi toristics, senon adaptar-se ara normativa dera Generalitat de Catalonha, qu’exigís incorporar aguesti lotjaments ara planificacion urbanistica municipau. Açò diferéncie a Naut Aran de municipis coma Vielha e Mijaran e Bossòst, qu’ena sua normativa vò limitar aguesti lotjaments en considerar que contribuïssen ara pujada deth prètz der abitatge.Cau rebrembar que Naut Aran a uns 1.200 pisi toristics, e qu’açò supause un de cada quate des registradi ena província de Lhèida. Era normativa dera Generalitat condusirie ath barrament d’un milenat, en permeter-ne un maximum de 192.