Reabilitaràn eth pònt pedonhau sus er arriu Nere en Vielha
Licite es òbres per 201.000 èuros
Vista deth pònt sus er arriu Nere, en Vielha e Mijaran.
Er Ajuntament de Vielha e Mijaran a metut en foncionament eth projècte de reabilitacion deth pònt pedonhau sus er arriu Nere, plaçat ena avenguda Pas d’Arró. Aguesta infraestructura, bastida hè mès d’un sègle, presènte un notable deteriorament pr’amor deth pas deth temps e es condicions climatiques dera zòna. Era òbra, qu’a un pressupòst totau de 201.965 èuros (IVA includit), se trape en licitacion e s’amiarà a tèrme en quate mesi. Eth projècte includís reparacions estructuraus coma era neteja e rebastiment des elements danhadi dera viga principau, eth refortilhament des armadures corroigudes e era aplicacion de tractaments protectors contra era oxidacion e carbonatacion. Ath delà, se reorganizaràn es canalizacions de servicis presentes ena estructura e s’installarà ena junta elastromerica tà evitar problèmes d’umiditat en contacte damb eth pònt adjacent. Pendent es òbres, s’abilitarà un pas alternatiu tà pedonhs tà minimizar es inconvenients ocasionadi. Era reabilitacion non sonque garantirà era seguretat e durabilitat deth pònt, mès tanben preservarà eth sòn valor istoric coma part deth patrimòni arquitectonic de Vielha.
