Vielha invertís 114.000 euros ena prevencion de huecs forestaus
Ajuntament e EMD impulsen ua planificacion conjunta tà protegir es pòbles
Eth ramat de Vilamòs pèish en entorn deth pòble per a on passe ua linha electrica. - ENDESA
Er Ajuntament de Vielha e Mijaran e es EMD deth municipi an metut en foncionament era redaccion de diuèrsi documents tecnics entà refortir era prevencion de huecs forestaus, milhorar era gestion deth bòsc e deth paisatge e aumentar era proteccion des nuclèus abitadi e der entorn naturau. Era iniciativa permeterà dispausar d’ua planificacion actualizada entà ordenar futures accions de neteja, conservacion e gestion dera vegetacion enes zònes de contacte entre es pòbles e es diferenti airaus forestaus. En un municipi de nauta montanha, damb ua grana superfícia e nombrosi nuclèus de populacion, era prevencion se considère fondamentau entà redusir risqui. Entath consistòri, era gestion deth bòsc, era conservacion deth paisatge e era proteccion son accions fondamentaus entà redusir era vulnerabilitat des pòbles, protegir es abitatges e es infraestructures e facilitar era intervencion des equipes d’emergéncia en cas que i age huec.
Er Ajuntament a encomanat era elaboracion deth plan de delimitacion des zònes de proteccion de 25 mètres entà tot eth tèrme municipau, damb un còst de 23.776 euros. Tanben redigirà eth sòn pròpri plan de Prevencion de Huecs Forestaus, pressupostat en 13.128 euros.
Parallèlament, es sèt EMD deth municipi, Betren, Casau, Aubèrt e Betlan, Escunhau e Casarilh, Gausac, Vilac e Arròs e Vila, elaboraràn es sòns pròpris plans de prevencion adaptadi as sues caracteristiques.
Aguesti trabalhs an un còst de 77.137 euros, des quaus era Generalitat n’aportarà 26.000 euros. Era rèsta, mès de 51.000 euros, seràn finançadi totauments per Ajuntament. En totau, era intervencion mobilizarà 114.000 euros. Eth còsso prumèr, Alberto López, a remercat qu’era prevencion “comence fòrça abans de que pogue aparéisher eth huec” e a relheuat qu’era gestion deth bòsc e eth trabalh amassa damb es EMD son essenciaus entà garantir era seguretat des vesins e preservar eth paisatge de Vielha.
