SEGRE

En guèrra contra eth tapatge nocturn

Er ajuntament ac mesurarà damb sonomètres en locaus d’òci. Era mesura se some ara normativa que proïbís naui establiments en airaus residenciaus e a limitacions en oraris de dubertura

Imatge d’archiu de medicions de tapatge ena Val d’Aran. - C.V.

Imatge d’archiu de medicions de tapatge ena Val d’Aran. - C.V.

Raúl Ramírez

Creado:

Actualizado:

Er Ajuntament de Vielha e Mijaran mesurarà eth tapatge des locaus d’òci nocturn, dempús d’auer arrecebut quèishes de forma reiterada per aguest motiu. Eth consistòri a trèt a concors aguestes pròves mejançant sonomètres, damb eth prètzhèt de “garantir eth dret ath descans, era conviuença vesiau e eth compliment dera normativa”, segontes cònste enes documents dera licitacion. Entà hè’c, apunte, “ei imprescindible incorporar as expedients ua pròva objectiva, verificable e defenible”. Aguesta mesura se some a d’autes qu’era equipa de govèrn d’UA a aplicat ath long dera darrèra decada entà combàter eth tapatge nocturn en cap-lòc dera Val d’Aran.

Ua discoteca e dus bars daurissen actuauments en orari nocturn en Vielha. Mesurar es sues emissions de tapatge ei eth prumèr pas entà determinar se supèren es limits legaus. Se quauqun d’eri ac hè, eth consistòri indique qu’a intencion d’avertir as infractors. Sonque se plantège era possibilitat d’imposar sancions a qui supère es limits e que, un viatge avertit, non actue entà adaptar-se ara normativa.

Eth baile, Juan Antonio Serrano, deth partit d’Unitat d’Aran, explique que dejà i aueren medicions “riguroses” deth tapatge des locaus d’òci nocturn ans endarrèr. Es naues medicions arriben arraïtz de mès quèishes d’alavetz ençà. Era prevision der ajuntament aranés ei hèr-les en cadun des locaus d’òci nocturn que i a en Vielha, en orari de dubertura des installacions e en condicions que siguen “representatives” des emissions de tapatge de cada establiment. Er Ajuntament de Vielha recorrís a ua enterpresa extèrna entà hèr-lo en non disposar de sonomètres omologadi pròpris, ne tanpòc de personau especializat en sòn usatge e capable d’eméter informes damb “validesa administrativa”. A previst adjudicar aguest servici en pòc temps mejançant un contracte menor, pr’amor qu’eth sòn impòrt lèu supère es 4.600 € damb IVA includit.

Es locaus, objècte d’aguestes medicions son es unics que pòden daurir es sues pòrtes ath public de net en centre de Vie-lha. Tanben son es darrèrs. Son anteriors a un cambi ena normativa urbanistica municipau qu’er ajuntament impulsèc en an 2017 entà proïbir aguest tipe d’establiments en quinsevolh zòna residenciau dera localitat. Açò, ena practica, limite actuauments era dubertura de naues discotèques o bars musicaus en municipi en airau industriau de Mijaran, quauquarren qu’enquia dia d’aué encara non a succedit.

Serrano s’a mostrat convençut de qu’eth futur der òci nocturn passe per aluenhar-se des airaus residenciaus. “Un moment o un aute s’acabaràn desplaçant”, valore e puntualize qu’es molèsties derivades der òci nocturn non sonque son atribuïbles as establiments: un viatge en carrèr, quaqui clients protagonizen en escadences actes incivics o ocasionen molèsties as vesins.

Ua auta mesura der ajuntament entà méter fin ath tapatge ei era de limitar es oraris de dubertura. Totun, Serrano indique que sonque hèn usatge d’aguesta potestat entà evitar qu’es locaus alonguen eth sòn orari enes periòdes que permet era normativa catalana.

tracking