Naut Aran rebaishe eth projècte deth Centre Civic un 40% e costarà 14 milions
Render deth que serà eth nau edifici de Salardú. - AJUNTAMENT DE NAUT ARAN
Er ajuntament de Naut Aran a dat lum verda ath nau projècte deth Centre Civic e Sociau de Salardú. En concrèt, s’a reformulat entà garantir ua major eficiéncia e un mendre còst entàs vesins. S’a redusit en mès d’un 40% en tot passar d’un còst aproximatiu de 24 a 14 milions d’euros.
Aguesta installacion prevé nau abitatges que seràn entà persones que viuen en Naut Aran, damb preferéncia entara gent grana e es joeni. Ath delà, tanben se bastirà ua piscina cubèrta entà que pogue emplegar-se tot er an. Era accion respon a ua des demanes istoriques d’aguesta zòna, damb era creacion d’ua sala de congrèssi que poirà acuélher convencions damb capacitat entà 300 persones. I aurà un gimnàs, dus nivèus de parcatge e zònes verdes.
Eth baile, César Ruiz-Canela, afirme que “aguest projècte ei eth mès ambiciós dera istòria de Naut Aran e serà ua realitat enes ans que vien”.
Eth nau complèxe se cauharà damb biomassa a trauès deth District Heating de Salardú, que garantirà ua grana reduccion de còsti. Eth Plen a aprovat tanben dues mocions en defensa deth professorat e dera educacion publica de qualitat en Aran e Catalonha, ua de Convergéncia Aranesa e ua auta d’Aran Amassa (ERC).
