Cant corau tà exportar er aranés
Era corau femenina Es Paoesses, ligada ara associacion culturau Es Paoms, assajarà setmanaument entà cantar dehòra dera Val. Publiquen un libre damb es cants liturgics d’Aran

Es quinze integrants dera corau, amassa damb era sua naua directora, Heike Giannotti, ena quèrra. - ES PAOMS
“Fòrça viatges se percep er aranés coma ua lengua mès der airau academic o universitari, mès aquerò que cercam nosati ei portar-lo a pè de carrèr”. Eth que parle ei Jaume Masana, president dera associacion culturau de Vilamòs, Es Paoms, que des de 2017 promò era lengua, era musica e era cultura aranesa a trauès d'exposicions, documentaus, activitats de transmission culturau e accions de recuperacion patrimoniau. Ua des sues darrères iniciatives, totun, s'estructure a compdar dera corau femenina ligada ara entitat, Es Paoesses, un grop vocau format per 15 hemnes de Vilamòs e de d'auti pòbles aranesi que pendent ans a representat era musica tradicionau e era votz des hemnes dera Val en actes deth pòble e celebracions populares. “Eth cant corau ei fòrça popular en Occitània, especiaument en França, mès Es Paoesses se diferéncien dera rèsta de coraus pr'amor qu'ei exclusivament femenina, ei arraïtzada en miei rurau e ei eth qu'a mès integrants”, ditz Masana.Damb aguest bagatge, era corau empren aué dia ua naua etapa que le pogue arribar a perméter “participar en intercambis en Occitània prumèr” e en d’auti lòcs de Catalonha e Espanha mès endauant, ath delà de “explorar naui genres musicaus” exclusivament en aranés. Eth rèpte que vòlen arténher, arribarà dera man d’ua naua directora damb ua longa trajectòria laguens deth cant corau, era alemana Heike Giannotti, que recentaments s’a installat ena Val d’Aran. “Eth grop començarà a assajar un viatge ara setmana ena poblacion de Bossòst, en Baish Aran”, hig Masana, qui non escarte “hèr gravacions en estudi”.Per ua auta part, Es Paoms presentèc pendent era hèsta major dera localitat de Vilamòs eth libre qu’era associacion a editat, a on se remassen es letres e es partitures des cants liturgics que “seguissen vius enes parròquies d’Aran”, afirme Masana. Era intencion, seguís eth director dera entitat, ei qu’eth volum sigue ua airina de referéncia entà contribuïr ara conservacion d’aguest patrimòni immateriau.