Educacion ambientau entà toti

Er interès pera conservacion deth mèdi ambient e era biodiversitat amassèc en 2017 a un grop de biològs e ambientològs residents en Aran que, dempús de diuèrses trobades, decidiren amassar fòrces tà promòir entre era ciutadania dera Val es sòns coneishements e experiéncia professionau ena proteccion des espacis naturaus. Aqueth siguec eth seme iniciau dera associacion Aran pera Natura, que d’alavetz ençà a centrat era sua activitat ena organizacion de talhèrs dubèrti damb es que se vò implicar as participants enes objectius fondacionaus dera entitat. Un exemple d’açò ei era vintea d’activitats qu’Aran pera Natura a desvolopat recentaments ena Setmana dera Natura, ua iniciativa de quinze dies qu’an finançat es ajuntaments d’Aran. Segontes era pòrtavotz d’aguesta petita associacion sense interès lucratiu, Inés Piazuelo, aguesti talhèrs s’adrecen principaument a escolans e d’auti usatgèrs de d’autes entitats, com era Associacion de Discapacitats d’Aran, damb era que, segontes explique, “se creen sinèrgies ben polides”.

Aran pera Natura tanben organize seguiments de fauna enes que “apropam eth territòri as residents. Ei ua airina d’educacion ambientau”, afirme Piazuelo. Ath delà, aguesti programes tanben an servit entà emportar-se suspreses. “Ues camères de fòtoparam captèren hè tres ans era imatge d’un huret en Portilhon, ena tèrme damb França. Hège 50 ans qu’aguesta bèstia non se detectaue ena Val d’Aran”, afirme. Segontes aguesta biològa e ambientològa, “metérem quauqua camèra de mès pera zòna e a tornat a gésser un parelh de viatges”, pr’amor qu’aguesti exemplars vien deth Luishonés e apareishen en Aran sonque quauqui còps “perque aguesta zòna ei era unica termièra damb continuitat de bòsc”.

Eth creishement dera entitat –ja a contractadi a dus tecnics– li a permetut proposar-se ara un nau rèpte: aufrir es sues activitats entàs toristes. “Entà Pasca comencèrem es contactes damb eth sector otelèr e es campings entà arribar as visitaires d’ua manèra mès dirècta”, ditz Piazuelo. “Volem aufrir ua experiéncia diferenta molt restacada ath patrimòni dera Val d’Aran e conscienciar ath torista d’aquerò que se trape e com trabalham entà conservà’c”. Un d’aguesti talhèrs entà visitaires d’aguest territòri de nauta montanha servís “tà descorbir eth mon des amfibis”, explique era pòrtavotz d’Aran pera Natura. “Un recorrut nocturn per diferenti endrets dera Val, tostemp ath torn de quauque airau d’aigua, a on explicam era evolucion e era importància ecologica d’aguestes bèsties”.