Manifest de Les

Segurament des der an 1978 non s’auie tornat a produsir un debat ideològic en Aran coma eth que s’està produsint pendent aguestes semanes. Segurament tampòc s’auie dat era oportunitat, des der an 1978, de méter er aranesisme, eth sentiment nacionau d’Aran e es interèssi d’Aran ath deuant d’un projècte polític coma eth que estam viuent.

Tot e qu’eth contèxte ei diferent, non dèishe d’èster ua oportunitat entà dessenhar eth futur deth nòste País.

Çò que òc ei diferent, son es protagonistas que le están portant a tèrme. Exceptat d’Emilio Medan que contonhe estant en plena forma e cau reconéisher, contonhe defensant Aran e eth nòste sentiment nacionau (er aranesisme) en contra deth sòn partit (Unitat d’Aran – PSC).

Eth Manifest de Les a estat eth motiu peth quau s’a daurit eth debat, fòrça gent s’a tret era pòur e fòrça gent a creigut que dar un pas en favor dera democràcia, dera reivindicacion justa e d’Aran ère un motiu suficientament important entà cridar ben naut, VOLEM VOTAR!

Es interpretacions interessades que critiquen negativament, relacionen era reivindicacion mès basica d’ua democràcia, coma ei votar, tamb votar que Òc. Arren mès luenh dera vertat. Es signants deth Manifest de Les demanam, as nòsti Ajuntaments, de poder votar toti e totes, tant es que vòlen votar que Òc, coma es que vòlen votar que NON. Perquè ath marge deth nòste posicionament individuau, plaçam era democràcia (eth dret mès basic) e eth País peth deuant de tot. Ja auem artenhut mès de 200 signatures e en volem èster mès. Èm enes pòrtes de poder construsir un País des dera base dera democràcia, ei a díder, votant! T’apuntes?