Es huecs
En mes de mai parlaua dera ploja que lèu cada dia queiguie e qu’afavorie era creishuda de vegetacion, en tot gaudir d’un paisatge espectacular, donques des d’alavetz, quate gotes! E per contra ja hè dies que se va avertint d’auer precaucion en anar tàs montanhes, pr’amor qu’aguesta situacion de calor e sequèra ajude a que quinsevolh incident produsisque un huec, coma es qu’auem podut veir en diferenti lòcs pendent aquerò que portam d’estiu. Darrèrament sentem er elicoptèr cada dia, ja que n’auem agut bèth un e per ara son controlats!
Pr’amor qu’eth trabalhar era tèrra hè temps qu’arribèc ara fin, era vegetacion der entorn des pòbles a creishut considerablament e tanpòc i a bestiar tà poder netejar aguesta abondor qu’auem aué dia en casa nòsta. Causa qu’a influït en paisatge, abans ath torn des pòbles i auie prats o tèrres e eth bòsc ère a mès nautada, actuaument, ath desaparéisher es prats, eth bòsc l’auem “ath darrèr dera pòrta de casa”, a anat recuperant terren a trauès dera succession ecologica.
Se pòt convertir en un mausòn, eth bòsc ei mès vulnerable, ei de besonh ua bona gestion forestau, adaptada ath cambi climatic. Aguestes temperatures qu’en Aran non se produsien abans, auíem bèth dia o dies, mès tant seguit, non! e coma qu’an arribat tà quedar-se mos cau premanir e cercar recorsi, precaucions en aguesti mesi d’estiu qu’es nòstes montanhes s’an convertit en grani espaci de lésser e d’espòrt damb diferentes activitats esportives organizades aguest darrèr mes de junhsèga.
Ei plan important abans de gésser planificar e conéisher eth terren, tà non provocar ua situacion complicada tà toti. Cau arténher un equilibri entre era accion der òme e era evolucion dera natura!!!
