Subasten mès de 14.000 tones de husta de bòsqui publics d’Aran

Mès de 14.000 tones de husta des bòsqui publics dera Val d’Aran an gessut a subasta. Les a convocat eth Conselh Generau d’Aran, en marc deth convèni que manten damb es diuèrsi ajuntaments e entitats municipaus descentralizades (EMD) entà hèr-se cargue d’aguestes licitacions e deth contròl posterior des bracades entà facilitar era gestion forestau en conjunt de tot eth territòri. Era aufèrta s’a dividit en un totau de ueit lòts que corresponen a d’autes tantes localitats proprietàries des terrens forestaus, e amassa somen un pressupòst de licitacion de 199.280 euros, IVA includit.

Era administracion aranesa dauric aguest procès eth passat mes de març e auie de barrar pendent aguesta setmana eth tèrme tà arrecéber aufèrtes. Era husta a subasta correspon as bòsqui publics des ajuntaments de Vielha e Mijaran, Arres, Bossòst e Es Bòrdes e des EMD de Betren, Arties e Garòs, Arròs e Vila. Son airaus pobladi damb auet comun, hai comun e pin ròi. Era màger part des lòts son d’arbes hustables, que somen mès de 10.000 tones. Era rèsta se dividís en mès de 3.400 tones de husta que se ven entà estèra e 300 entà lenha, aguestes darrères limitades as bòsqui d’Es Bòrdes e d’Arròs e Vila.

Es adjudicataris de cada lòt dispausaràn d’un tèrme de 18 mesi entà adjudicar es trabalhs. Pera sua part, personau designat peth Conselh Generau d’Aran aurà de susvelhar eth procès d’extraccion dera husta. Entad aquerò, s’an previst mesures coma era installacion de camères automatiques enes bòsqui, verificar que sonque se braquen es arbes senhalizadi e comprovar es pesatges des camions en bascules autorizades.