Era Passion, oculta en un mur

Era paret nòrd dera glèisa de Sant Julian de Garòs, en Naut Aran, sauvèc pendent decennis un secret dejós dera caudea que la caperaue: ues pintures muraus que representen era Passion de Crist datades entre es sègles XV e XVI. Sigueren descubèrtes de manèra accidentau en 2013 e en 2024 se hec ua prumèra intervencion entà trèir-les de nau ara lum. Ara, era entitat municipau descentralizada (EMD) d’Arties e Garòs trabalhe en un projècte entà reabilitar-les e garantir-ne era conservacion.

Es pintures aflorèren pendent uns trabalhs de conservacion deth temple hè tretze ans. Es operaris avertiren dera preséncia de pintures en mur e, aqueth madeish an, se verifiquèc mejançant cates, era existéncia d’un ampli conjunt picturau ocult. Era enterpresa qu’amièc a tèrme aguestes pròves iniciaus, TdART Heritage Curators SLU, hec tanben era prumèra intervencion entà descurbir-les en 2024 e a redactat eth projècte entà conservar-les. Era entitat menor descentralizada, pera sua part, a iniciat es formalitats entà dar-li era aprobacion iniciau ath procès.

Eth document avertís deth deficient estat de conservacion des muraus, pintadi en sec e degradadi pera umiditat. “Eth hèt d’auer estat cubèrti de caudea probablaments a favorit qu’arriben enquias nòsti dies, mès ath madeish temps ne dificulte era conservacion”, afirme eth projècte, qu’explique que “en moment de lheuar es capes de caudea e pintura suberposades, part des pigments e colors son arrincadi”. Es trabalhs, damb un pressupòst de 12.910 euros, includissen era neteja dera capa picturau damb mejans mecanics e quimics, era reposicion de mortèr aquiu a on a desapareishut e era retirada de cablejat e enlumenat que se trapen sus es muraus, entre d’autes intervencions. Tanben s’installarà un panèu explicatiu.