Liciten es òbres tà 15 intervencions prioritàries en refugi dera Restanca
Supausaràn ua inversion de lèu 97.000 euros
Eth refugi ei ena zòna periferica deth Parc Nacional d’Aigüestortes i Estany de Sant Maurici.
Eth Conselh Generau d’Aran a trèt a concors es òbres entà reformar eth refugi dera Restanca, bastit en 1970 ath cant deth lac deth madeish nòm, ena zòna periferica deth Parc Nacional d’Aigüestortes i Estany de Sant Maurici, en Naut Aran. Es trabalhs an de servir entà completar 15 accions prioritàries remassades en informe tecnic der edifici, en qué se descriu un plan d’intervencions entara sua conservacion e milhora. Es òbres an un pressupòst aproximatiu de 97.000 euros.
Entre aguestes mesures se prevé ua actualizacion completa dera installacion electrica des tres plantes deth refugi, includida era substitucion dera illuminacion actuau per ua auta damb tecnologia de LED, o era incorporacon d’un sistèma de lum ultraviolada entath tractament d’aigua qu’assegure era esterilizacion dera que se capte dirèctaments d’un arriu d’apròp.
Tanben ei prevista era installacion de dus extractors: un ena codina, a on se plaçarà ua campana de tipe industriau; e un aute en ua des dues crambes igieniques dera bastissa, qu’encara non dispausaue d’aguest equipament. En aguest sens, eth projècte tanben includís era verificacion deth sistèma de ventilacion e eth bastiment de vies de seguretat entara installacion de gas ena codina. Tanben se substituiràn es dus cauhadors electrics d’aigua cauda sanitària existenti. Ei prevista tanben per part deth Conselh Generau era reparacion des desperfèctes enes parets e tets e eth repintatge der edifici dempús de netejar e trèir es taques d’umiditat, e se cambiarà era pòrta exteriora metallica dera prumèra planta per ua auta de milhors prestacions. Eth projècte tanben prevé intervencion ena cubèrta dera bastissa.
