Mès proteccion deth miei naturau e er accès ath Saut deth Pish, en taxi

Eth Conselh a ampliat era proteccion des principaus paratges naturaus damb era aprobacion d’ua naua ordenança d’accès motorizat ath miei, just 25 ans dempús de tramitar era prumèra normativa sus era circulacion de veïculs en pistes e camins. Eth tèxte (qu’entrarà en vigor enes dies que vieràn un viatge se publique eth decrèt) proïbís era circulacion d’autocaravanes e caravanes per pistes forestaus pendent era sason d’ostiu perqué es sues dimensions non garantissen era seguretat ena circulacion. Eth pas d’aguesti veïculs ja ère excepcionau enquiath dia d’aué, o nul, segontes hònts deth madeish Conselh, mès non i auie cap de proïbicion explicita. En parallèl, era ordenança regule er accès enes mesi d’ostiu tà cadun des endrets jà protegidi en aguest sens: es ribères de Valarties e Aiguamòg; era ribèra deth Joeu; era Bassa d’Oles; era Bassa d’Arres e era ribèra de Varradòs-Saut deth Pish. En darrèr cas, enguan an i aurà nauetats, segontes es madeishes hònts, pr’amor que per prumèr viatge er accès damb veïcul tath Saut deth Pish se poirà hèr sonque en un taxi abilitat. Se tracte d’un entorn fòrça valorat peth torisme que visite Aran que se compause de dus sauts damb aigua provenenta principaument deth lac Long de Liat, plaçat uns quilomètres ath nòrd. En aguest sens, s’a previst d’abilitar ua zòna de parcatge en Pònt d’Arròs, des d’a on es toristes auràn de préner un taxi entà arribar en Saut deth Pish, a uns 12 quilomètres de distància. Aguest sistèma s’a emplegat dejà hè ans tà accedir as lacs de Colomèrs ena ribèra d’Aiguamòg, a on eth parcatge se place enes Banhs de Tredòs. En cas dera Artiga de Lin, eth parcatge ei ath cant dera ermita dera Mair de Diu dera Artiga e des d’aquiu se pòt accedir tara Artiga damb un trenet toristic. Ena Bassa d’Arres e ena d’Oles er accès tanben ei regulat e i a un parcatge damb places limitades. En Valarties, eth parcatge ei en Arties e eth trajècte s’a de hèr en autocar. Ath marge d’açò, er accès en veïcul particular ei condicionat ara capacitat des parcatges apròp de cada paratge. Era situacion des parcatges se pòt consultar en GuidAran.