Reclamen milhorar era carretèra entre Baqueira e Beret, maumerenta
Er Ajuntament a sollicitat ara Generalitat un projècte entà milhorar er estat dera via
Era cantèra a desapareishut en quauqui trams dera carretèra. - ILC
Circular peth tram de ueit quilomètres entre Baqueira e Beret pera carretèra C-142b s’a convertit en un suplici entàs conductors qu’empleguen d’abituda aguesta via, que ja hè ans qu’ei plea d’irregularitats, horats e deformitats que meten en risc era seguretat des usatgèrs e tanben er estat des sòns veïculs. Aguesta circonstància afècte especiaument as grops de ciclistes que pendent es mesi de primauera e ostiu hèn aguesta rota, segontes denoncièren a SEGRE usatgèrs dera carretèra, e que certifiquèren eth sòn estat de “penós”. Aguesta madeisha via tanben ei fòrça transitada per toristes qu’esquien en aguest parçan dera Val pendent es mesi d’iuèrn. Es madeishes hònts se planhen que cap d’administracion s’age implicat entà milhorar er estat d’aguesta infrastructura deuant dera possibilitat d’un naut risc d’accidentalitat.
Pera sua part, eth baile de Naut Aran, César Ruiz-Canela, confirme que “auem recebut fòrça quèishes”, per estat dera C-142b e afirme qu’eth sòn estat ei “desastrós”, damb trams enes que de hèt, s’an desdiboishat es marges dera via, fòrça castigada ath long des ans peth clima iuernau d’Aran e era aplicacion de potassa.
Açò n’a aumentat eth desgast e a provocat nombroses filtracions d’aigua en asfalt, çò qu’a derivat ena aparicion d’un gran nombre d’irregularitats e deformitats. Totun, eth mès naut representant municipau avertís qu’eth manteniment d’aguesta carretèra ei competéncia dera Generalitat de Catalonha, “e qu’er Ajuntament ja a sollicitat ara Conselheria de Territòri qu’implemente bèth tipe de mi-lhora dempús de non auer-ne hèt cap ath long de fòrça temps”.
En aguest sens, Ruiz-Canela, explique que s’amassarà lèu damb era delegada de carretères de Lhèida, Núria Font, entà tractar aguesta qüestion, mès opine qu’ei possible qu’eth projècte se retarde mès per “qüestions pressupostàries”, pr’amor qu’era prioritat deth Departament de Territòri ei restaurar era empeirada dera carretèra C-28 que s’esbaussèc en iuèrn ara nautada de Ruda.
