Eth parcatge de 1.500, de pagament

Eth parcatge de Baqueira 1.500, de mès d'un milenat de places, deisharà d'èster gratuït en pòqui mesi e es usatgèrs auràn de pagar un euro mès IVA per ora o 12 euros mès IVA per un dia d'estacionament. Es propietaris, eth Conselh Generau d'Aran e er Ajuntament de Naut Aran, an arribat a un acòrd en vertut deth quau aguest darrèr adjudicarà era explotacion deth parcatge a ua enterpresa en regim de concession pendent 25 ans. Eth Plen municipau aprovèc era setmana passada eth plec de clausules deth concors, que se convocarà lèu.Era enterpresa adjudicatària aurà de pagar un canon ath Conselh e ar Ajuntament d’entre un 5% e un 10% dera facturacion en brut. Mès gran sigue eth percentatge, mès puntuacion receberà era aufèrta tà adjudicar eth contracte.Era concessionària aurà d’assumir era gestion e eth manteniment deth parcatge, atau coma amiar a tèrme inversions per valor de dus milions d’euros entà hèr reparacions e dotar ath parcatge de naui servicis. Aurà d’installar cargaders entà veïculs electrics, lavabos publics e installacions entà qu’es autocaravanes i poguen uedar es depòsits d’aigües residuaus. Tanben aurà de milhorar era accessibilitat entà persones damb mobilitat redusida.Eth plec de clausules prevé qu’er Ajuntament de Naut Aran e eth Conselh Generau d’Aran consèrven un detzenat de places cadun entath sòn us pròpri. Eth parcatge a 560 places tà coches, ua trentea entà autocars e seishanta entà d’auti veïculs de mès de cinc mètres, com es autocaravanes.Dehòra dera sason d’iuèrn, eth parcatge acuelh concèrts e celebracions. Era concessionària aurà de cedir aguest espaci de manèra gratuïta entà que se poguen hèr.Eth parcatge acuelh en iuèrn part des autocaravanes de trabalhadors de temporada que non pòden pagar un aute lotjament pes prètzi deth mercat immobiliari der abitatge en Aran. Tanben aguest collectiu aurà de pagar per estacionar en aguest parcatge.