Eth ramat de Vilamòs cerque pastor
Eth Conselh Generau licite era custòdia e susvelhança de 220 caps de bestiar, propietat der Ajuntament. Er adjudicatari aurà d’iniciar e consolidar era produccion de lèit de craba

Eth ramat comunau de Vilamòs ei format per uns 220 exemplars de oelhes e crabes. - ACN
Es 220 oelhes e crabes deth ramat comunau propietat der Ajuntament de Vilamòs, auràn de cambiar de pastor eth 1 de noveme, quan començarà eth nau periòde d'adjudicacion de gestion d'aguest bestiar. Son quauqu’uns des èishi deth projècte Ovihuec.dat, promoigut peth Conselh Generau d'Aran, er Institut de Recerca e Tecnologia Agroalimentàries (IRTA) e eth consistòri entà fomentar era ramaderia extensiva, era recuperacion e conservacion deth paisatge, eth foment dera biodiversitat e era recuperacion des abitats des peisheus, atau com era reduccion deth risc de huec forestau ena Val d'Aran. Un aute des objectius ei instaurar ua metodologia aplicabla en d'autes zònes de nauta montanha.Per aguest motiu, eth Conselh Generau a licitat aguesta setmana un nau contracte entà hèr-se cargue d’aguest ramat enquias darreries de 2028, damb ua possible prorròga d’un an e un pressupòst base de lèu 110.000 euros. Er adjudicatari aurà de custodiar, susvelhar e neurir ath ramat eth periòde d’estabulacion, ath delà d’aufrir supòrt as parts que i pogue auer pendent eth periòde de gestacion. Eth contracte, ath delà, compde damb un cofinançament deth 40% per part dera subvencion ‘Supòrt a programes e projèctes d’impuls ara bioeconomia’, cofinançada peth Hons Europèu de Desvolopament Regionau (FEDER).Eth contracte tanben establís un plan de peisheus, e definís tres zònes diferenciades pròplèues deth nuclèu de Vilamòs e dera bòrda deth ramat. Ath delà, ei obligatòri qu’es bèsties pèishen aumens dus viatges ar an en cadua des zònes, ua per semèstre. Er expedient tanben remèrque que seràn excludides deth plan de peisheus es finques de titularitat privada enes que non se dispòse d’autorizacion. Eth ramat tanben s’equiparà damb dispositius de seguiment de ramaderia extensiva via GPS entà facilitar-ne era localizacion e manejament.Er adjudicatari tanben s’aurà de hèr cargue de tota ua sòrta de trabalhs silvicòles, coma crèmes controlades o trabalhs de desbrossatge que li demane eth Conselh. Aguestes obligacions, segontes era pròpria licitacion, non superaràn en cap de cas es quate ores setmanaus.En çò que tanh ath periòde d’estabulacion, er adjudicatari arreceberà deth Conselh Generau d’Aran o der Ajuntament de Vilamòs eth materiau de besonh entà barrar ath ramat, atau coma er aliment de besonh entà neurir-lo pendent eth long periòde qu’es bèsties s’an de arrecerar deth clima de nauta montanha dera Val d’Aran ena tempsada iuèrn. Atau madeish, eth beneficiari deth contracte compdarà damb eth supòrt d’un tecnic de benèster animau designat per IRTA.
Produccion de lèit
Ua des nauetats ei qu’eth nau pastor deth ramat comunau que se trobe enes entorns dera poblacion de Vilamòs aurà d’iniciar e consolidar, pendent eth prumèr an de contracte, era produccion de lèit damb es crabes que i a en ramat, ua trentia d’exemplars. Segontes era documentacion deth contracte, er adjudicatari poirà gestionar e decidir era destinacion dera produccion a cambi d’un plan d’inversions ena explotacion de 500 euros annaus.