Les crubarà fiança per emplec d’installacions publiques
Entà garantir-ne eth manteniment, pr’amor que son fòrça reclamades entà activitats

Eth plen der Ajuntament de Les a on s’a aprovat era fiança entà mantier equipaments. - A.L.
Eth plen der Ajuntament de Les a aprovat ena sua session ordinària de seteme crear ua ordenança entà regular era cession e er usatge d'espacis, sales e installacions municipaus a on s'amien a tèrme activitats per part d'associacions, grops e entitats, atau com activitats ludiques particulares des vesins. Er ajuntament vò facilitar e fomentar qu'es ciutadans poguen hèr a servir es equipaments publics, pr'amor qu'an d'èster ath servici dera vida sociau, culturau e comunitària des persones que viuen en pòble. Segontes eth baile, Andreu Cortés, “non se tracte d'ua taxa, senon de depausar ua fiança entà un us responsable des installacions qu'encara ei per establir”.Er ajuntament aranés qu’apertie ath parçan deth Baish Aran aurà de fixar era quantitat dera fiança entà qu’es vesins hèsquen un usatge responsable des equipaments. Cortés indique que “son dependéncies fòrça reclamades e, bèth còp, an patit desperfèctes, damb era fiança volem auer era garantia que se retornen en un bon estat”, remèrque. Cortés explique qu’aguesta mesura non a cap de tipe d’interès lucratiu, ja qu’er ajuntament sonque se sauvarie era quantitat depausada en cas que calgue hèr reparacions.Eth maxim responsable municipau explique qu’ “auem era sala de iòga e balh, es aules de formacion e era sala sociau deth camp de fotbòl que se pòden emplegar quan es vesins les agen de besonh, mès qu’an de deishar-se com se trapauen ar inici dera activitat”. Remèrque qu’ “ei imprescindible que toti ne hem un usatge responsable e que suenhem es installacions, perque son espacis de toti e cau mantier-les en bones condicions”.Eth municipi de Les compde damb diuèrses aules e dependéncies sociaus qu’acuelhen autant actes publics coma privats. “Aguesta fiança que s’establirà en pòqui dies servirà entà que s’empleguen es espacis damb critèri, pensant en que son a disposicion de toti, per aquerò ne cau garantir eth manteniment sense que supause un còst ath consistòri”, puntualize Cortés.