Un centre d’enterpreses a on dormir

Eth projècte entà convertir era antiga aubèrja Matacabòs en un centre tecnologic capable d'atrèir naues enterpreses e abitants en Les, en parçan deth Baish Aran, chòque damb era manca d’abitatge accessible en tota era Val d'Aran. “Ei eth principau obstacle entà atrèir e retier talent, trabalhadors e naua populacion”, segontes un informe encomanat per ajuntament coma pas preliminar a incorporar aguest equipament ath hilat de Centres d'Innovacion Territoriau Hèpic amassa damb eth qu'ei plaçat ena localitat de Casau e ath previst en Vielha. Eth madeish document propòse coma solucion qu'ua part dera bastissa recupère era sua antiga foncion coma lotjament (que deishèc d'aufrir hè uns 15 ans) entà acuélher de manèra temporau as que i establisquen era activitat economica.“Se prepause un espaci de lotjament temporau d’entre dus e tres mesi que pogue servir coma trampolin entà que naui professionaus e familhes poguen installar-se en territòri mentre cerquen abitatgedefinitiu, facilitant atau era atraccion de populacion”, senhale er informe, que prepause establir un espaci de coliving (abitatge damb espacis comuns compartidi) “coma ua solucion dirècta e de besonh” en edifici coma responsa dauant dera “crisi der abitatge”.Er informe, elaborat pes firmes Biko e Rural Citizen, cite opinions de vesins remassades en un procès de participacion preliminar. Eth document met de relhèu quauques “cites importantes” des participants entà illustrar eth problèma dera manca d’abitatge e deth besonh d’aufrir lotjament ena aubèrja: “Aciu ena Val d’Aran non i a lòc entà víuer. E en Les, jo dideria que practicament mens qu’en quinsevolh aute lòc... Son tot pisi toristics”. “Pòs montar causes polides... mès ei que non as a on víuer. Alavetz, qui volerà anar entà un emplaçament atau se non i pòt víuer?Er ajuntament se mòstre d’acòrd damb eth besonh de lotjament en futur centre entà enterpreses, mès indique qu’eth nombre de places ei encara per determinar.Dauant dera limitacion que supause era manca d’abitatge accesible en Les e era rèsta dera Val, er informe senhale era proximitat de Les respècte dera termièra francesa coma ua des mès potentes causes deth projècte. “Era proximitat e era connexion naturau damb França ei un auantatge competitiu unic qu’aufrís accès dirècte a un mercat, un ecosistèma d’innovacion (Tolosa) e oportunitats de cooperacion que d’auti territòris des Pirenèus non an”.