Er Espitau poténcie eth personau e aufrís mès punts ar aranés

Eth Conselh Generau, a trauès d’Aran Salut, a iniciat naui procèssi de contractacion tà refortilhar era plantilha de personau sanitari der Espitau Val d’Aran de Vielha. Concretaments, cèrque incorporar ua lheuadora, un fisioterapeuta comunitari a jornada parciau (60 %) e un odontològ a mieja jornada.

Es naues contractacions ei previst que s’amien endauant entre es mesi d’agost e seteme e se pòt optar ada eres ena web www.salut.conselharan.org.

Coma nauetat destacada d’aguest procès, eth Conselh a decidit valorar per prumèr viatge en airau sanitari qu’es aspirants as places de fisioterapeuta e odontològ coneishen era lengua aranesa o se comprometen a aprener-la en un tèrme determinat, en tot acreditar posterioraments eth nivèu aquerit.

Aguesta mesura, inedita enquia aué dia en sector sanitari dera Val, respon ar objectiu de promòir er usatge der aranés en sector public e milhorar atau era atencion sanitària ara ciutadania. Non ei naua en procèssi selectius deth còs de Pompièrs e Emergéncies o entà personau administratiu.

Cau destacar qu’enes aufèrtes publicades non cònsten coma requisits ne aspècte a avalorar-se eth coneishement de cap idiòma mès.

En cas dera plaça de lheuadora, era aufèrta contèmple oraris adaptadi as besonhs e disponibilitat deth candidat, ath delà dera possibilitat de participar en projèctes de desvolopament professionau. Totes es places son d’interinitat, en tot èster era d’odontològ d’ua durada de dus ans e era rèsta, de caractèr indefinit. Er Espitau Val d’Aran, qu’atie a ua poblacion aproximada d’11.000 abitants ena Val d’Aran, dejà auie publicat entre es mesi d’abriu e hereuèr aufèrtes entà trapar especialistes en medicina familhara e comunitària, cirugia generau, obstetricia e ginecologia e traumatologia.

Arresponien ath besonh de planificar relèus dauant jubilacions o cambis professionaus, e segontes hònts deth Conselh, eth servici dejà a demorat cubèrt.