Reparen era cubèrta deth tanatòri tà sanejar es gotères

Er ajuntament de Vielha e Mijaran amie a tèrme ua actuacion integrau entà milhorar es installacions deth tanatòri municipau, damb trabalhs de reparacion ena cubèrta exteriora dera bastissa e en diferenti espacis der interior der equipament. Es òbres, totun, s’an sectorizat entà mantier eth foncionament abituau deth tanatòri plaçat ena localitat de Vielha, ena zòna deth poligòn de Mijaran, mentre se hèn es reparacions.

En exterior s’installe ua naua cubèrta metallica damb isolament termic, çò que servirà entà milhorar era eficiéncia energetica der edifici e esvitar qu’atau se poguen produsir problèmes per gotères e umiditats. Segontes informe eth consistòri deth cap-lòc dera Val d’Aran, aguesta solucion aurà de servir entà garantir era durabilitat der edifici respècte ath clima de montanha pròpri de Vielha, ath delà de milhorar eth comfòrt des usatgèrs.

Aguesta actuacion se complemente damb es que s’amien a tèrme en interior der equipament, a on se reparen es zònes de faus tet precisaments afectades per umiditats e gotères que s’an anat produsint enes darrèri ans peth mau estat dera cubèrta. Tanben s’adecuen detalhs interiors dera bastissa e se revise es installacions vinculades as airaus intervengudi.

Pendent es pròplèus setmanes continuaràn damb es trabalhs en diferentes zònes deth tanatòri municipau, en tot desvolopar actuacions interiores, trabalhs d’acabat e milhores en dessenh des espacis, damb er objectiu de crear un entorn mès comfortable, foncionau e acuelhedor, ath delà de refortir era seguretat e era conservacion des installacions. Totes aguestes actuacions an un pressupòst d’ath torn de 41.000 euros.