Vielha met limits as gats de carrèr

Er Ajuntament de Vielha e Mijaran a trèt a informacion publica eth programa municipau de gestion etica e contròl populacionau de colònies felines, tà “establir eth marc municipau d’accion” entad aqueth objectiu, que se desvoloparà mejançant eth metòde CER, consistent en aplicar eth procediment de “captura, esterilizacion e retorn” des animaus.

Eth programa entrarà en vigor quan eth sòn contengut age estat ratificat de nau peth plan dempús d’incorporar es allegacions que se poguen presentar pendent era formalitat d’exposicion publica.

Eth document prevé “establir era obligatorietat dera identificacion mejançant microchip, jos titolaritat dera administracion locau competenta, e era esterilizacion cirurgica des gats comunitaris”, e ad aquerò se i hig “eth besonh d’articular mesures de collaboracion ciutadana, atencion sanitària, mapatge e cens” e establir “protocòls d’accion en espacis privadi e sistèmes de resolucion de conflictes vesiaus”.

Eth programa que impulse eth consistòri de Vielha e Mijaran se fixe coma objectius, entre d’auti, “redusir de manèra progressiva e etica era reproduccion incontrolada des gats comunitaris” e “milhorar er estat sanitari e es condicions de vida” des animaus que les intègren; e, tanben, “implantar un sistèma municipau d’identificacion, registre, seguiment e avaloracion de colònies felines” e “favorir era convivéncia vesiau e minimizar es incidéncies derivades dera preséncia d’aqueri grops de gats de carrèr en nuclèu urban”.

En aguest sens, aguest programa prevé qu’era naua normativa se pogue aplicar, “tostemp que sigue oportun, en espacis de titularitat privada” e non sonque enes de caractèr public. De hèt, hig, se meterà en foncionament “en toti es nuclèus e airaus deth municipi enes que i pogue auer preséncia establa o retirada de gats comunitaris”

Er Ajuntament de Vielha e Mijaran, eth que mès poblacion compren de tota era Val d’Aran, se prepause méter en marcha “un registre intèrn de colònies felines, de caractèr administratiu e operatiu, a on s’incorporaràn es colònies identificades e validades en tèrme municipau” e a on constarà era “existéncia de persones collaboradores assignades”. Associat ad aguest instrument, “se harà un cens progressiu des gats comunitaris deth municipi, damb era finalitat d’adequar era programacion d’esterilizacions, microchipatge, atencion veterinària e seguiment deth volum reau de populacion existenta”.

Eth programa establís qu’era participacion de collaboradors “aurà caractèr volentari, non retribuït e non implicarà relacion laborau, foncionariau ne contractuau damb eth pròpri consistòri, ne atribuirà representacion municipau exceptat d’abilitacion exprèssa entà accions concrètes”. Participaràn en aguesti trabalhs d’alimentacion e de captura des gats deth carrèr.