Garòs s’aumplirà de bachata, salsa e kizòmba en Aran SBK Festival

Naut Aran ja cauhe motors entara celebracion deth SBK Festival 2026, qu'eth fin de setmana deth 4 ath 6 de seteme transformarà es carrèrs e places deth nuclèu de Garòs entà qu'es apassionadi dera dança poguen gaudir d'un gran scenari en aire liure entà practicar salsa, bachata e kizomba, un estil de balh en parelha que neishec en Angòla a darreries des ans 70 e principis des 80.Aguesta cita annau, impulsada per Ajuntament de Naut Aran organizada amassa damb era escòla de balh BalhAran e Dame Una Social Dance, se vò consolidar com un eveniment referent qu’amasse ritme, torisme e cultura en plen entorn naturau. Era prepausa mantierà eth sòn caractèr gratuït damb er objectiu d’apropar era dança a quinsevolh persona, e fomentar atau un espaci de convivéncia accessible autant entà dançaires experimentadi com entà vesins, familhes e visitaires. Ath long des tres dies, era programacion includirà ua ampla varietat de talhèrs formatius dirigidi per professors de prestigi, ath delà d’actuacions musicaus en dirècte, balh sociau en carrèr, sessions de DJ e food trucks. Atau madeish, entà facilitar era arribada e era estada des assistents que viatgen en autocaravana, era organizacion abilitarà ua zòna especiau entà poder parcar-i aguesti veïculs.Eth baile deth consistòri de Naut Aran, César Ruiz-Canela, afirme que “èm fòrça contenti deth gran impacte d’aguesta iniciativa, qu’aumplís de vida ath pòble”. Pera sua part, era organizacion a dit qu’eth hestau a provocat qu’es places entà lotjar-se en Garòs aqueth fin de setmana siguen lèu agotades, e que quauqui assistenti “an auut de cercar lotjament en localitats vesies”.