Les impulse un nau poligòn de servicis

Er Ajuntament de Les impulse era modificacion des normes subsidiàries entà desvolopar eth sector Escamon 2, un airau de sòu urbanizable destinat a usatges d'activitat economica, qu'aufrirà continuitat ath poligòn tradicionau e completarà era zòna dejà consolidada.Era prepausa a coma finalitat reclassificar terrens actuaument consideradi sòu non urbanizable entà desvolopar un nau poligòn d’activitat economica. Eth baile deth consistòri de Les, Andreu Cortés, apunte qu’er ajuntament vò “incentivar era promocion economica laguens deth municipi e completar eth hilat comerciau”, didie.Er airau compde damb ua superfícia de 8.962 mètres carrats ath nòrd deth nuclèu urban de Les, entre eth limit deth casc antic e eth sector dejà desvolopat, en marge dera carretèra N-230. Cortés, apunte tanben qu’existís ua fòrta pression peth sòu destinat a comèrç, servicis e parcatge, autant entath consum locau coma termièr damb França. “Aguest nau sector permeterà acuélher petites e mejanes enterpreses deth municipi que non compden damb pro espaci en sòu urban actuau”.Era actuacion urbanistica tanben contemple era milhora des accèssi e dera mobilitat dera zòna damb eth bastiment d’ua naua rotonda que regularà es tres sectors industriaus de Les.Segontes eth maxim representant d’aguest entorn, era creacion d’aguest nau airau respon ath besonh de sòu entara activitat economica e de servicis. Ath delà, hig que tanben s’artenheràn naui espacis liures atau coma equipaments, en tot milhorar era connectivitat deth pòble damb era zòna Escamon a trauès deth passeg der arriu Garona. En aguesta zòna tanben ei previst un espaci de parcatge, que completarà es actuaus.Segontes Cortés, des de Vielha equiath Baish Aran (Es Bòrdes, Vilamòs o Bossòst) non existís cap poligòn d’activitat economica aprovat ne terrens adequadi entà futurs creishements. “Aguesta modificacion non sonque ordene un crei-shement urban e racionau, mès tanben consolide un airau de servicis estrategic en municipi damb un gran potenciau d’atraccion de consumidors francesi, refortilhant era economica e eth hilat productiu locau”.Era prepausa s’adèqüe ath plan director urbanistic dera Val d’Aran e se treirà a informacion publica entà que se poguen presentar allegacions, explique Cortés.