22 d’agost
Aué se celèbre eth dia Mondiau deth folclòre, declarat pera UNESCO en 1960, en aumenatge ad aqueres actuacions artistiques e autoctònes que reflèxen es costums, tradicions, un bocin dera cultura d’un lòc, identificant aguestes expressions tamb era identitat deth país. Eth tèrme “folclòre” s’empleguèc per prumèr còp en an 1846, er arqueològ britanic Wiliam Jhon Thoms titulèc era sua colomna en ua revista britanica tamb aguest nòm, en tot determinar “folc” hè referéncia a pòble e “lore” a saber e des d’alavetz s’a adoptat internacionaument eth mot tà designar tot aquerò que caracterize era identitat culturau des pòbles. Tamb era celebracion d’aguest dia podem comprovar era positivitat e importància d’aguest legat.
En Aran n’auem manifestacions d’aguest tipe a trauès des grops de dances, n’auem cinc: era Còlha de Santa Maria de Mijaran, es Corbilhuèrs, es Fradins, es Sautarèts e es Gripets, es uns mès actius que d’auti. Ada eri cau arregraïr era conservacion e promocion dera musica, des dances e des cançons dera nòsta tèrra. Pendent er estiu ne podem gaudir d’eri enes hèstes majors des pòbles o ena actuacion programada en diferenti lòcs peth Conselh Generau d’Aran. Ath delà dera dança e era musica, contribuís en espectacle era vestimenta pròpria que pòrten es participants.
Es iniciadors des còlhes an hèt un trabalh de recèrca plan important, en tot compdar tamb gent grana deth territòri e documentacion avienta tara escadença, refortilhant era memòria collectiua, causa qu’a permetut qu’arribe as nòsti dies a trauès de generacions. Atau que, gràcies ara transmission orau e ara practica des grops an darrèr an. Felicitats a toti e totes!!!
