SEGRE

Creado:

Actualizado:

Vam a entrar ena setmana des hèires, que se celèbren en Les, Salardú, Vielha e Bossòst. Son hèires de tardor, pr’amor qu’ei quan baishaue eth bestiar dera montanha. Actuaument son escambis comerciaus, pòc de bestiar mès òc d’ua grana preséncia de parades de tot tipe de genre, sustot de tei-shut, artesanaus e de productes tradicionaus, mès tanben i a bèra parada d’airines entath lèu desapareishut pagés, pògui ne queden!

Enquiàs ans 50/60 es hònts dera economia aranesa èren era ramaderia e er aprofitament deth bòsc. Per açò entath comèrç deth bestiar s’anaue entàs hèires deth Palhars, dera Ribagòrça o d’Aragon. Dejà ena Edat Mejana i auie relacions comerciaus damb er aute costat dera termièra, en tot arribar a acòrds entà poder garantir eth pas tàs vals vesies, mès tanben tà poder crompar es matèries prumères qu’era Val d’Aran auie de besonh e non n’auie, coma er òli, era sau o eth vin. Non tostemp s’an respectat aguestes relacions, es guèrres an estat un des motius pes qu’èren soent interrompudes. Un des tractats ei eth de Lies e patzeries de 1513 que se signèc en Plan d’Arrem, lòc actuaument identificat damb ua polida escultura inaugurada damb motiu des 500 ans deth tractat, entre eth Pònt de Rei e eth pòble de Hòs. Pera sua situacion Aran a estat un lòc de pònt comerciau entre es dus païsi.

Serà en 1728 quan eth rei d’Espanha, Felip V, autorize era celebracion de dues hèires ar an (era ua en mes de seteme e era auta en octobre) e un dia de mercat setmanau ena vila de Vielha (es dijaus). Era jornada a devengut en un dia hestiu damb era participacion de gent de toti es pòbles d’Aran, e que comence damb un esdejoar popular. Bones hèires tà toti!!

tracking