Ampliaràn era planta de residus tà controlar milhor era organica

Eth Conselh a aprovat eth projècte tà renovar e ampliar era planta de transferéncia de residus municipaus plaçada ena boca nòrd deth tunèl de Vielha, dempús de constatar que diuèrsi elements der equipament son fòrça vielhs e, en diuèrsi casi, trincadi, dempús d’ans d’usatge. Eth projècte, ath delà, servirà entà incrementar era capacitat de magazematge, aprofitar quauqui espacis qu’actuauments non son foncionaus e dispausar per prumèr còp d’ua zòna cubèrta hèr era neteja de quauqui camions de transpòrt de residus enes madeishes installacions, entre d’autes actualizacions.

Eth pressupòst totau ei de 410.000 euros. Es trabalhs tanben an de servir entà limitar e controlar era produccion de lixiviats —liquids toxics generadi pera descomposicion de residus organics que rossèguen contaminants— ena actuau zòna de recepcion dera Fraccion Organica des Residus Municipaus (FORM), ara expausada ara accion dera ploja e era aigua que trauèsse era superfícia deth terren superficiauments provenenta de varats der entorn. Entà artenhé’c s’amiaràn a tèrme tres intervencions: bastir ua cubèrta metallica ena zòna de recepcion dera FORM entà qu’era nhèu e era aigua non quèiguen dirèctaments sus es residus, çò qu’aumente innecesàriament eth sòn pes e es lixiviats a transportar; e installar un sistèma de drenatge inferior ena caisha de recepcion dera FORM entà transportar es sòns lixiviats tà un depòsit sosterranh.

Aquiu s’emmagazemaràn e periodicaments se transportaràn entath sòn tractament. Era zòna a on se placèc era recepcion dera FORM coïncidís, tanben, damb un punt baish deth varat de drenatge perimetrau dera plataforma dera planta, de manèra que, as lixiviats dera pròpria fraccion organica e era possibla ploja que pogue quèir sus era zòna se higen as que transpòrten es aigües que trauèssen era superfícia. Entà evita’c se harà un doble drenatge transversau en varat e ena plataforma tà evitar sedimentacions de solids.