Un guardadèr tà contemplar era Val coma ena Edat Mieja

I auec un temps en qu’eth principau centre de poder militar e administratiu ena Val d'Aran auec era sua sedença en Castèth Leon, lheuat en 1283 en ua situacion estrategica ath cant deth pòble d'Es Bòrdes. Der esplendor medievau dera fortalesa sonque demoren en pè quauqui murs, e non existís cap mesure que pogue palliar eth long procès de degradacion des roïnes dempús dera destruccion deth castèth en 1719.

Eth deth Plan de Sostenibilitat Toristica deth Conselh Generau d’Aran, totun, contemple era recuperacion d’aguest espaci coma part dera sua estratègia entà redefinir eth torisme ena Val, e projècte profitar es rèstes arquitectoniques deth Castèth Leon entà que torne a èster un punt de referéncia en paisatge, mostrar era sua istòria e recuperar eth caractèr de guardadèr privilegiat que permete observar e compréner era Val damb ua perspectiva similara ara qu’aufric pendent sègles era tor der aumenatge dera antiga fortalesa.

Damb un pressupòst de 182.000 euros, era prepausa a previstes quate actacions. Redefinir leugeraments eth camin d’accès, entà tot çò que serà de besonh desbartassar eth terren e installar gradons de pèira enes trams damb mès pendent. En arribar ara tor, eth visitant entrarà directaments en un espaci de projeccions semiexcavat ena ròca a on s’explicarà era istòria deth Castèth Leon.

Des d’aquiu madeish se poirà accedir ath nau guardadèr, que serà presidit per un imponent monolit que cerque tornar a plaçar eth Castèth Leon coma referent en paisatge e ath torn deth quau vire era pròpria roïna.

Er enlumenat tanben aurà un papèr important ena recuperacion deth Castèth Leon, pr’amor que s’installaràn lumenàries en camin, talusi de pèira, es rèstes arquitectoniques e en monolit que presidirà tot eth conjunt, un far en paisatge nocturn d’Es Bòrdes que soslinhe era forma verticau dera tor originau.