Projècten hèr dera aubèrja de Matacabòs un centre tecnologic
Equipament d’innovacion transfronterèra tà atrèir talent e naues enterpreses
Ena bastissa ja s’executèren òbres est’an passat entà milhorar-ne era eficiéncia energetica. - AJUNTAMENT DE LES
Er Ajuntament de Les impulse era reconversion dera antiga aubèrja de Matacabòs en un Centre d’Innovacion Tecnologica transfronterèra, un projècte estrategic tà dinamizar era economia locau e atrèir talent. Dempús de 15 ans barrat er equipament, eth consistòri plantege ua naua forma de veder-lo que combinarà espacis de trabalh compartidi, creacion d’enterpreses e un futur “lotjament”, explique eth baile, Andreu Cortés (UA).
Ena bastissa s’an executat òbres entà milhorar era eficiéncia energetica, qu’an compdat damb un pressupòst de 325.000 euros. “S’a actuat en toti es barraments, er isolament, era cubèrta, e ena installacion d’un sistèma de climatizacion d’aerotermia”, explique Cortés. Tot aquerò s’a finançat damb hons deth programa de regeneracion e rèpte demografic entà reabilitar bastisses de titularitat publica. Atau madeish, ei previst destinar 250.000 euros deth Ministèri entara Transicion Ecologica e Rèpte Demografic, en marc de projèctes singulars, entà impulsar un coworking e fomentar era creacion de naues enterpreses.
Cortés a hijut qu’er objectiu ei integrar aguest nau centre en hilat deth Hèpic Hub de Vielha, refortint atau eth sistèma d’innovacion dera Val d’Aran. “I a ua demana reau e volem aprofitar-la, pr’amor qu’eth centre de Vielha a totes es places cubèrtes”, diguec.
Eth consistòri iniciarà lèu ua campanha de difusion des naui usatges d’aguest equipament entà atrèir a potenciaus usatgèrs. Ua des sues singularitats serà era incorporacion de petiti apartaments en pròpri edifici, en tot configurar atau ua prepausa de coworking e coliving, que facilite era installacion “de naui talents e emprenedors”, a dit Cortés. “Aufriríem loguèrs accessibles tà periòdes cuerti de 2 o 3 mesi a professionaus, trabalhadors e familhes que desiren installar-se en territòri, en tot dar-les temps e ua basa establa entà trobar un abitatge definitiu”.
Era Aubèrja de Matacabòs auie acuelhut des des ans 60 activitats juveniles, colònies e siguec lotjament entà trabalhadors de temporada. Eth nau plantejament propòse un modèl fòrça innovador qu’aprofite era proximitat damb eth país de França entà facilitar projèctes tecnologics e empresariaus de caractèr transfronterèr.
Parallèlaments, er Ajuntament dera localitat deth Baish Aran tanben trabalhe ena futura reforma dera bastissa InfoLes, plaçada en parçan d’Escamon, coma centre d’acuelhuda toristica deth municipi. En aguest sens, eth baile apunte qu’er Ajuntament a dia d’aué ei pendent dera aprobacion de modificacions urbanistiques entà intervie en aguest equipament.
