Era tornada des campanes: Es repics de Vilamòs dan es ores des de hè sies mesi
Dempús d’ans en que sonque sonauen en hèstes majors e funeraus. Ath pòc de recuperar-les, er ajuntament les acuertèc a peticion des vesins
Eth campanau, dempús dera restauracion des campanes en 2023. - CGA
Es campanes dera glèisa de Santa Maria de Vilamòs ja hè sies mesi que sònen entà mercar es ores e es quarts, dempús d’ans en que sonque s’entenien en motiu de hèstes e funeraus qu’auien lòc en aguest endret.
Eth pòble a recuperat aguest trèt dera sua vida tradicionau gràcies a un procès de diuèrsi ans qu’a requerit òbres, mès tanben dialòg damb vesins que non èren acostumadi as repics. Recuperar aguest son des campanes, bastides enes ans 1841 e 1886, exigic en prumèr tèrme trabalhs entà restaurar es joates de husta que les empare.
Eth Conselh Generau d’Aran hec aguesta intervencion en 2023 e hec possible que poguessen bondair damb regularitat. Aguesta intervencion dauric era pòrta a installar, dempús, dispositius entà automatizar es repics, similars as que se trapen aué en dia en nombrosi campanaus des comarques de Lhèida. Ara les contròle eth madeish baile des d’ua aplicacion en sòn telefon mobil (veir detalh). En octobre d’est’an passat, es campanes dera glèisa de Vilamòs comencèren a mercar es ores. En un principi ac hèren des 8.00 deth maitin enquia miejanet, damb tòcs simples enes quarts e dobles enes ores. Totun, ath pòc temps, eth consistòri amortèc es tòcs dempús de constatar planhs entre quauqui vesins peth son, especiaument pes nets. D’alavetz ençà sonen des 8.00 enquias 23.00, ua ora mens, e non i a doble tòc entà mercar es ores.
“Eth son des campanes ei un element qu’aufrís vida e apòrte ambient ath pòble”, afirme eth baile der ajuntament de Vilamòs, Oriol Sala (UA), qu’explique que, des qu’establiren er actuau orari des campanes, “non i a auut mès planhs” peth son des campanes, maugrat qu’ac atribuís en part a qu’es vesins s’an acostumat ath sòn son. “D’auti bailes m’expliquen qu’en uns mesi arribaríem a non entener-les, e atau a estat”, a afirmat eth màger representant municipau.
Un campanau automatizat e un repic encara per estrear
Eth baile de Vilamòs ei eth que hè a sonar es campanes dera glèisa, sense auer auut d’apréner er antic mestièr des campanèrs. Eth campanau a installadi, des de hè un an, dispositius que permeten automatizar es repics e eth màger representant municipau les contròle a trauès deth telefon mobil. Era aplicacion qu’emplegue entad aquerò a un menú damb quauqui tòcs ja programadi, com es que mèrquen es ores e anóncien celebracions e funeraus.Tanben i a un aute repic de campanes qu’es vesins deth pòble encara non an entenut: eth qu’a coma finalitat alertar ara poblacion dauant emergéncies, com es huecs. “Encara non l’auem emplegat e ei milhor qu’atau sigue”, explique eth baile, Oriol Sala.
