Interior reformarà era comissaria des Mòssos e higerà un edifici annèxe

Era Conselheria d’Interior dera Generalitat de Catalonha a metut en foncionament eth procès tà hèr era reforma integrau e era ampliacion dera comissaria des Mòssos d’Esquadra en Vielha. Començarà damb era licitacion d’un contracte qu’includís era redaccion des projèctes constructius e era execucion des òbres, e que supausarà ua prumèra inversion de 2,55 milions d’euros. Er objectiu ei méter ath dia es installacions dera actuau comissaria, qu’a ua superfícia de 410 mètres quarrats, e tanben doblar er espaci disponible damb eth bastiment d’un nau edifici annèxe de 535 mètres quarrats. Eth plec de condicions dera licitacion, especifique qu’aguesta naua construccion a d’èster connectada damb era actuau comissaria mejançant ua passarèla. Tanben ei previst hèr era adequacion des espacis d’urbanizacion exteriors e es accèssi, qu’aucupen uns 3.000 metres quarrats.

Moduls prefabricadi

Era redaccion e execucion d’aguestes òbres ei prevista en Programa d’Encargue d’Accions aprovat pera Generalitat de Catalonha a darrèrs de 2024, a on ei previst qu’es milhores que se hèsquen en diuèrses comissaries des Mòssos d’Esquadra se desvòlopen emplegant moduls prefabricadi. Aguest sistèma constructiu escuerce es tèrmes des òbres entre un 40 o un 50%, mès a obligat a contractar conjuntaments era redaccion deth projècte e era execucion des òbres, pr’amor qu’ei imperatiu qu’era equipa redactora e era constructora trabalhen amassa des deth prumèr moment perque eth dessenh e era construccion son part d’un unic procès integrat. D’aguesta manèra, eth concèpte d’òbra in situ pèrd pes: es moduls se bastissen e se revisen en un talhèr o fabrica, e un viatge completada era prumèra fasa, eth trabalh en solar se redusís a un assemblatge de precision.Era execucion des òbres se desvoloparà en dues fases. Ena prumèra se bastirà er edifici d’ampliacion damb un tèrme d’òbra qu’ei previst que sigue d’ath torn de 10 mesi. Quan acabe era part iniciau deth projècte, eth personau policiau trabalhador d’aguest equipament s’installarà en aguestes naues dependéncies ara demora de que se pogue completar era reforma dera actuau comissaria, que non s’a d’alongar-se mès de sies mesi.