Nau parcatge entà deishar dehòra deth pòble es coches toristics
Er ajuntament artenh ajuts deth Puosc tà pacificar eth transit en Setmana Santa e ostiu
Imatge der actuau parcatge collectiu de Canejan, en quau pòden aparcar enquia 15 coches. - AJUNTAMENT DE CANEJAN
Eth parcatge tà veïculs qu’ei plaçat ena entrada de Canejan ei petit, per çò qu’er ajuntament dera localitat a aprovat un projècte entà bastir ua naua zòna a on es visitaires e es toristes poguen deishar es sòns coches sense besonh d’entrar damb eri en pòble.
Atau ac confirme eth baile de Canejan, Juan Carlos Lastera, qu’explique qu’era zòna de parcatge que se tròbe en foncionament, damb capacitat entà 15 veïculs, non ei suficienta entà “evitar es aglomeracions qu’acostumen a produsir-se enes epòques de mès afluéncia de visitaires, coma en Setmana Santa, en ostiu e tanben en quauqui dies der iuèrn”, quan era arribada de veïculs se multiplique.”En quauques situacions s’an produsit importanti problèmes de circulacion”, afirme eth maximom representant municipau, qui ahig que “de çò que se tracte ei d’aufrir es maximes facilitats as persones que vien a visitar-mos”. Er actuau parcatge ei gratuït, e segontes Lastera, tanben ac serà eth qu’ei projectat.
Eth nau parcatge, en cambi, doblarà era capacitat der actuau, en tot arribar enquias 30 veïculs, e tanben se plaçarà ena entrada de Canejan. “Volem evitar qu’es visitaires que volguen anar tà Canejan arriben caminant”, insistis Lastera. Es òbres entà bastir aguest nau equipament auràn d’adjudicar-se aguest madeish an, segontes indique eth baile, pr’amor qu’entà afrontar era inversion er ajuntament a arrecebut ua subvencion deth Plan Unic d’Òbres e Servicis de Catalonha (Puosc). Eth montant totau deth projècte ascendís a quauquarren mens de 240.000 euros, e segontes Lastera, es trabalhs poderien iniciar-se a darreries d’an. Ath delà, segontes eth pròpri baile, tanben s’installarà un sistèma de senhaus luminoses entà indicar era existéncia d’un dusau parcatge public quan er actuau sigue complèt. D’aguesta forma, Canejan poirà arribar a acuélher enquia un maximom de 45 veïculs, triplicant atau era capacitat actuau. “Seguraments, damb aguest nau parcatge ja poiram solucionar aguesta problematica”, afirme eth representant dera localitat aranesa.
