Nau autar entara Pietat de Bossòst

Era poblacion de Bossòst viuec era passada dimenjada ua jornada istorica damb era consagracion deth nau autar dera capèla dera Pietat, un acte presidit peth bisbe monsenhor Josep-Lluís Serrano, qu'amassèc a fòrça vesins e metec en valor un des espacis mès emblematics deth patrimòni religiós deth municipi.Era capèla dera Pietat, coneishuda tanben coma Capèla dera Mair de Diu dera Pietat, se trape ar inici deth Camin Reiau, que connècte era Val d’Aran, e da nòm a un des principaus carrèrs dera localitat. Ath delà deth sòn valor devocionau, ei part dera antiga rota des sèt capèles istoriques que, segontes era tradicion, entornejauen Bossòst entà protegir-lo dera pèsta.Eth nau autar, elaborat a compdar d’un blòc de granit blu extrèt des montanhes der entorn, simbolize era estreta relacion entre eth pòble e eth sòn territòri. Era pèça ei òbra d’Antonio Barbosa e a estat possibla gràcies ara collaboracion de diuèrsi vesins dera localitat, segontes explique era bailessa d’aguest municipi, Montse de Burgos, coma Abraham Carpintero, Adri Gómez, Carlos Gómez, Joaquín Vivancos, Andrés Ortiz, Guille Hernández e Jordi Costa, entre d’auti.Pendent era celebracion tanben siguec reconeishut eth trabalh des persones que s’encueden de manèra constanta dera capèla, que se daurís ath culte cada an eth 5 d’agost e qu’acuelh tres des passi que se trèn en processon pendent era Setmana Santa. “Eth nau autar nèish damb era vocacion d’èster un legat entàs futures generacions e un testimòni deth compromís collectiu damb era conservacion deth patrimòni locau”, diguec era bailessa Montse de Burgos.Era capèla dera Pietat intègre era populara Rota des Ermites, un recorrut que rebrembe era legenda segontes era quau un monge indiquèc as abitants de Bossòst que lheuèssen diuèrses capèles orientades entath pòble entà empedir era entrada dera pèsta. Era tradicion parle de sèt capèles protectores: Sant Fabian e Sebastian, Sant Ròc, Sant Cerat, Sant Joan Crisostòm, Sant Antòni, era Pietat e ua setau plaçada ath cant de Soala de Casteràs. Aguest conjunt constituís un des simbèus istorics e culturaus mès singulars dera localitat aranesa.