Se replantège era comissaria

Era Generalitat de Catalonha treirà de nau a concors era reforma e era ampliacion dera comissaria des Mòssos d'Esquadra en Vielha dempús qu'eth passat mes de mai era prumèra licitacion demorèsse desèrta per manca d'aufèrtes. Era conselheria d'Interior amie a tèrme eth projècte a trauès dera enterpresa Infraestructures.cat e en declarar desèrt eth concors decidic daurir un periòde de consultes damb enterpreses deth sector entà milhorar es condicions dera licitacion, de forma que pogue interessar as constructores. Aguest extrèm ei especiaument complicat en tot auer en compde que se tracte d'ua òbra de tèrme prolongat e que requerís ua ampla plantilha que, se non ei locau, aurà de residir dera madeisha forma aguest temps ena Val d'Aran, çò qu'encarís es còsi de construccion.Eth projècte ei valorat en 2,5 milions d’euros damb impòsti e implique eth bastiment d’ua naua bastissa prefabricada de mès de 500 mètres quarrats qu’aurà d’èster connectada damb era actuau, de 410 mètres quarradi, mejançant ua passarèlla. Tanben includís era renovacion der actuau e prealablaments era redaccion des projèctes iniciaus e constructius. Segontes es clausules deth concors, eth tèrme totau entà amiar a tèrme eth projècte ei de dus ans e dus mesi, des quaus 16 mesi son entara execucion des òbres. Abans de declarar-se desèrt eth concors, era prevision ère d’iniciar era ampliacion dera comissaria damb eth nau edifici en junhsèga der an 2027.Hònts dera conselheria senhalen qu’enes darrères setmanes s’an mantengut amassades damb dues enterpreses deth sector qu’aurien mostrat iniciauments interès en projècte, se ben non concurriren, tà milhorar es clausules.Era milhora dera ABP de Vielha forme part d’un paquet de projèctes de reforma qu’afècten a lèu totes es comissaries deth Pirenèu: segontes es madeishes hònts, ena de Pònt de Suert se redacte un projècte d’ampliacion; es de Tremp e Puigcerdà tanben seguiràn aguest procès; era de Sòrt completèc ua des dues fases d’ampliacion e ena dera Seu s’estúdie actuauments ua formula d’ampliacion. Ena Plana s’executen o son dessús dera taula es projèctes des comissaries de Mollerussa e de Lhèida ciutat.Eth projècte dera comissaria dera ABP de Vielha ei eth major des qu’aguest an an demorat desèrti per manca de licitants. En totau, i a mès de quate milions d’euros, execucion dera quau ei paralizada perqué es concorsi an demorat desèrts. Ua des principaus causes de qu’açò succedisque ei qu’era aufèrta economica non ei suficentaments atractiva entàs enterpreses e aquerò ei degut, en part, a qu’es concorsi non an incorporat er encariment des diuèrsi còsti que se’n pòden derivar deth sòn bastiment.