Disputa judiciau per òbres en Ruda

Era urbanizacion dera Val de Ruda, eth darrèr gran desvolopament urbanistic vinculat ath torisme d’esquí en Pirenèu de Lhèida, hè ans qu’ei objècte d’un litigi judiciau entre er Ajuntament de Naut Aran e era enterpresa promotora, Neu 1.500 SL. Dus decènnis dempús der inici des òbres, quan ja s’an bastit centeats d’abitatges destinadi a segona residéncia e a loguèr toristic, locaus comerciaus e establiments otelèrs e de restauracion ath torn deth telesèra de Baqueira Beret, eth consistòri reclame dauant des tribunaus qu’era societat mercantila pogue assumir era construccion de zònes verdes previstes en projècte, atau com era reparacion de defèctes e mancances qu’a constatat en via publica. Era enterpresa, pera sua part, defen que ja an acabat es trabalhs. Eth baile, César Ruiz-Canela, explique que, mentre s’a alongat eth litigi, er Ajuntament a auançat sòs entà actuacions basiques coma era reforma des trepaders, reparar desaigües deth hilat desgots, pintar barraments de proteccion e amiar a tèrme trabalhs de manteniment. Era darrèra senténcia, dictada peth Tribunau Superior de Justícia de Catalonha (TSJC) eth passat mes de mai, a dat era rason ath consistòri. Considère valids es informes municipaus sus es mancances enes òbres dera urbanizacion respècte as presentadi pera enterpresa e ratifique ua resolucion dera corporacion municipau que, en 2022, exigic ara enterpresa acabar es òbres pendentes en Ruda e depausar mès de miei milion d’euros coma garantia d’execucion d’aguesti trabalhs. “Es informes des tecnics municipaus son concludents”, afirme era senténcia, qu’avalòre qu’es sòs reclamadi per ajuntament “s’ajusten as tèrmes establidi” ena anteriora senténcia. Er auto condemne en còstes ara part recurrenta a pagar un maximum de 3.000 euros en concèpte de còsti deth procès judiciau. Neu 1.500 SL compde ara damb era possibilitat de presentar un recors de cassacion dauant deth Tribunau Suprèm.Tanben son pendenti es tribunaus d’un aute front dera batalha juridica de Ruda: eth palai de congrèssi inacabat. Se tracte der immòble qu’auie d’acuélher aguest equipament, atau com un centre de ‘wellness’ e ua escòla mairau infantila. Un convèni entre er Ajuntament e Neu 1.500 SL en 2006 hec possible bastir-lo en sòu qu’era firma auie de cedir ath consistòri, mès es òbres demorèren interrompudes. Demorèc ua estructura ueda dera que, en un prumèr moment, degun se’n volie hèr cargue.Autant er Ajuntament de Naut Aran coma era enterpresa voleren rescindir eth convèni, encara qu’en condicions fòrça diferentes. Eth promotor exigic ath consistòri eth pagament d’un milion d’euros pera estructura bastida; mentre qu’aguest reclamèc desroïr-la en considerar que non ère utila e apropiar-se damb ua fidança de 186.000 euros. Ara, er scenari que se considère ei fòrça diferent, pr’amor qu’er Ajuntament a era intencion de promòir era finalizacion des òbres e dar un usatge ar immòble.

Comission d’Urbanisme d’Aran

Eth prumèr pas entà artenher-lo ei ampliar es possibles usatges que poirà auer aguesta construccion. Entad aquerò, er Ajuntament impulse un cambi ena normativa urbanistica dera zòna. Arrecebec era aprobacion definitiva ena session dera Comission d’Urbanisme d’Aran celebrada en junhsèga, a despiet qu’era execucion der acòrd demorèc temporaument en suspens, segontes corroborèc eth Departament de Territòri.