Un minjador tara escòla d’Arties
Er Ajuntament ampliarà er edifici, bastit enes ans trenta, damb naui espacis entà substituïr eth barracon installat en 2010. Eth projècte prevé ua inversion de 258.326 euros

Era escòla Loseron d’Arties a eth minjador en un modul prefabricat. - GOOGLE STREET VIEW
Er Ajuntament de Naut Aran dotarà d'un nau minjador escolar ara escòla d'educacion primària Loseron dera localitat d'Arties. Ac harà damb ua ampliacion der edifici que substituïsque ath barracon prefabricat installat en an 2010 que hè aué dia aguesta foncion. Er immòble guanharà atau ua superfícia bastida d'uns cent mètres quarrats. Eth projècte a iniciat era sua tramitacion dempús d'arrecéber era aprobacion iniciau deth consistòri eth passat mes d'agost e era inversion de besonh entà hèr-lo s'estime en 258.326 euros, segontes cònste ena memòria avalorada.
Eth nau minjador d’aguest equipament educatiu serà ath nivèu dera planta baisha, sense desnivèu respècte ath sòu. Atau ac explique era memòria deth projècte qu’apunte qu’era ampliacion dera bastissa aurà d’acué-lher tanben d’auti naui equipaments entath centre educatiu. Atau, en un costat ei previst un annèxe entà installar-i ua codina, damb ua entrada exteriora ara quau s’accedirà a trauès d’ua rampa, servicis entàs escolans e un petit magazèm.
Era ampliacion der immòble se harà ena cara nòrd dera escòla, entre er actuau edifici e eth carrèr. Se tracte d’un espaci ombrèr laguens dera parcèla qu’aucupe eth collègi, a on, segontes era documentacion deth projècte, “i é er espaci liure entà edificar qu’ei mens susceptible d’usatge, pr’amor que non li tòque eth solei e ei fòrça heired, sustot en iuèrn”. Eth tet dera ampliacion sera planèr, damb un leugèr pendent entà facilitar era evacuacion autant dera aigua dera ploja coma era provedenta deth desgèu quan se delís era nhèu dera cubèrta.
Era construccion d’aguest nau espaci educatiu exigirà derroïr part dera façada nòrd dera escòla Loseron d’Arties entà connectar er edifici damb es naues installacions plantejades. Era escòla, d’estil naucentista, siguec bastida enes ans trenta deth sègle XX. Se ben non a cap de figura de proteccion patrimoniau, forme part der Inventari deth Patrimòni Arquitectonic de Catalonha. Ei era sedença dera zòna escolara rurau (ZER) formada per aguest centre e es de Ruda de Salardú e Castè-th-Leon d’Es Bòrdes.
Era conveniéncia de bastir un nau minjador entàs escòles s’abordèc a darrèrs d’est’an passat, pendent ua amassada entre representants des servicis territoriaus deth Departament d’Educacion en Pirenèu e membres des diuèrsi ajuntaments dera Val d’Aran. Pendent era session se rebrembèc qu’eth modul prefabricat en Arties auie de lotjar as alumnes deth centre de manèra temporau e que, totun, portaue quinze ans en servici. Aquiu s’apuntèc era idea que “damb ua bona distribucion, serie possible encaishar eth minjador laguens deth madeish centre”, segontes remasse era acta d’aguesta amassada.