Era aucupacion toristica d’Aran puge en ostiu pera demana estrangèra

Era Val d'Aran a barrat er ostiu damb 616.020 pernoctacions, un 6,56% mès que pendent eth madeish periòde der an anterior. Entre eth 1 de junh e eth 13 de seteme s'an comptabilizat 37.920 estades mès, segontes es dades dera plataforma SIM de telefonia mobila facilitadi peth Conselh Generau a trauès de Torisme Val d'Aran. Eth creishement ei motivat principaument peth torisme internacionau, qu’a passat de 156.230 pernoctacions en an 2025 enquias 183.360 aguest an. França se manten coma eth principau mercat emissor, damb 122.271 pernoctacions e un increment deth 28,92%. Tanben an crei-shut damb fòrça es mercats des Païsi Baishi, un 50,30%, Àustria, un 73,90%, e China, un 38,63%. Totun, es Estats Units an retrocedit un 6,18%, mentre que Romania, Israel e Marròc an registrat uns descens superior ath 40%. En aquerò que tanh ath mercat nacionau, Barcelona ei encara era principau origina, damb mès deth 35% deth totau, a despiet de redusir es sues pernoctacions un 6,4%. Lhèida, Valéncia, San Sebastian e Saragossa an matengut chifres similares as der 2025.Eth mes de junhsèga siguec eth mes damb ua evolucion mès destacada en aquerò que hè as pernoctacions, damb un aument deth 14%, çò que represente eth 64% deth creishement totau dera sason. Agost seguic en tot èster eth periòde de màger afluéncia, damb 284.170 pernoctacions, un 3,59%. Entre eth 1 e eth 13 de seteme se registrèren 35.410 estades. Era aucupacion otelèra milhorèc especiaument a compdar deth mes de junhsèga. Dempús deth 49,86% de junh, artenhec eth 63,80% en junhsèga e eth 78,23% en agost, era chifra mès nauta dera sèria disponibla entad aguest mes. Entre es prumèrs tretze dies de seteme arribèc ath 63,44%, respècte ath 47,23% de 2025. Es campings tanben registrèren resultats positius e en agost es bungalows arribèren a ua ocupacion deth 82,65% e es zònes d’acampada un 73,58%, damb increments ath torn d’un 10%. Era Val d’Aran recebec ath delà a 379.300 excursionistes, respècte as 244.810 d’est’an passat. Eth mercat internacionau compdèc es 262.620 visitants, un 20% mès, e es excursionistes francesi representèren eth 83,26%. Eth dia de mès grana afluéncia siguec eth 18 d’agost, damb 6.668 persones. Es sensors installadi en espacis naturaus an permetut analisar es fluxes de visitants e veïculs. Es dades deth periòde comprenut entre eth 1 de junh e eth 13 de seteme mòstren ua reduccion generau deth transit de veïculs en diuèrsi punts, encara que quauqui resultats son condicionadi pes mesures de regulacion aplicades enes accèssi a paratges naturaus. En Varradòs, eth transit motorizat queiguec un 47,91%, enquia 8.111 registres, pr’amor dera regulacion aplicada. En çò que tanh ara Transgarona, es sensors de Bèussa e Aubèrt, confirmen un emplec significatiu der itinerari autant a pè coma en bicicleta e se comptabilizèren 5.555 bicicletes e 40.603 persones a pè. Eth conselhèr de Torisme, Josep Canut, destaque qu’es dades mòstren ua major internacionalizacion, ua evolucion favorabla en seteme e auanci ena desestacionalizacion e era gestion sostenibla deth territòri. Tanben era fidelizacion deth torisme nacionau e un equilibri entre era activitat toristica e era conservacion deth territòri.