Eth nau cors
ja a passat era Mair de Diu de seteme e comence de nau era normalitat, es vacances s’an acabat e un nau cors auem peth deuant que mèrque a totes es familhes, prumèr as mainatges e mainades, as pairs e tanben as pairs-sénhers.
Un nau cors que comence tamb mès professionaus, en tot hèr mès enfasi en reforçar era educacion inclusiua, tamb mès aules d’acuelhuda, tamb mès integradors sociaus, logopèdes e trabalhadors sociaus. Aguest aument, segontes era conselhèra d’Educacion e Formacion Professionau, servirà entà enfortir eth sistèma e mi-lhorar era atencion as besonhs der escolanat, demorem qu’açò sigue atau!
Se preten tanben un refòrç tamb era atencion sanitària en bèri centres (50% des centres de Catalunya) professionaus qu’atieràn escolanat tamb malauties croniques o es qu’an bèth besonh en orari escolar.
Ua auta prioritat entà enguan ei eth refòrç ara lectura, que se ven rossegant de hè temps, era competéncia a estat tostemp un des tèmes critics e debatuts en encastre educatiu. Pr’amor des resultats der informe Pisa’25 que sigueren d’un nivèu plan baish, encara que Catalunya a invalidat es resultats catalans, a on s’includissen es aranesi, pera comparacion en tot excludir un nombre determinat (23%) der escolanat. Era abituda de liéger a amendrit fòrça entre es joeni, e un des motius ei era digitalizacion e era cultura des pantalhes, includida era des mobils, qu’a demostrat era manca d’atencion e d’interès deuant d’un tèxte. Açò a estat ua virada definitiua entara restrenhuda des pantalhes, proïbint er usatge de telefons mobils e relòtges intelligents en totes es etapes obligatòries dera educacion. Un shinhau tard, ath mèn vejaire, mès i vam!!!