Òbres en Bagergue tà depurar aigües residuaus

Era Entitat Municipau Descentralizada (EMD) de Bagergue a iniciat ua naua fasa de milhora deth sistèma de sanejament en nuclèu urban, damb era execucion d’òbres de separacion d’aigües pluviaus e residuaus en carrèr Sant Esteve, era plaça dera Caleta e era plaça Major. Aguesta actuacion, finançada a trauès deth Plan de Cooperacion Municipau tà Inversions en Matèria de Salut dera Deputacion e damb hons pròpris dera EMD, complète eth hilat modèrn iniciat en 2022 e forme part d’ua estrategia entà optimizar era gestion der aigua e redusir er impacte ambientau en municipi. A auut un pressupòst de 31.442 èuros.

Era actuacion forme part d’ua estrategia de desplegament progressiu deth hilat d’aigües separatives ena localitat, damb eth prètzhèt de milhorar era gestion des aigües, evitar collapses en hilat e redusir er impacte ambientau. Aguesta qüestion s’emmarque ena planificacion futura de connexion de totes es aigües fecaus deth pòble damb era depuradora de Naut Aran, mejançant un collector generau, ath madeish viatge que se trabalhe tà separar es aigües pluviaus en tot eth nuclèu, pr’amor qu’aguestes non pòden èster tractades pes sistèmes de depuracion.

Bagergue ei actuauments er unic nuclèu urban deth municipi de Naut Aran que non tracte es sues aigües fecaus mejançant un sistèma de depuracion, ua situacion qu’era EMD trabalhe tà revertir. Eth sòn president, Marc Tarrau, destaque qu’es òbres assoliden eth compromís de Bagergue damb era modernizacion des servicis publics e era proteccion der entorn naturau. “Volem adaptar-mos ara normativa ambientau vigenta e auançar entà un modèl de gestion d’aigua mès eficient, responsable e sostenible”, assegure.