Eth transpòrt damb dròns demore eth permís der Estat

Eth projècte pionèr dera Val d’Aran tà transportar mercaderies damb dròns entà zònes de nauta montanha ei, a dia d’aué, ara demora deth vist-e-platz per part der Estat. Era enterpresa Pirineos Drone Aviation, nei-shuda ena pròpria Val, demore era autorizacion dera Agéncia Estatau de Segurerat Aeriana (AESA) entà iniciar era pròva pilòt contractada peth Conselh Generau d’Aran. Aguesta iniciativa, que poderie meter-se en foncionament a compdar de juriòl se s’obtièssen es permisi de besonh, consistís en estudiar aplicacions des dròns ena logistica rurau. Entre es usatges previsti, destaquen eth subministrament de materiaus a refugis de montanha, eth montatge d’infraestructures de comunicacion e supòrt ara ramaderia extensiva, en tot oprimizar atau es recorsi e redusint còsti dauant alternatives coma er elicoptèr.

Es pròves se haràn damb eth dròn Flying Basket FB3, un modèl capable de transportar enquia 100 quilòs de carga. Aguest dròn transportarà sau, barraments tà ramat, aliments e d’auti subministraments ath refugi dera Artiga de Lin. Es prumèri vòls auràn d’inaugurar-se damb eth traslat de 30 quilòs enquia dus quilomètres de distància, en tot simular eth transpòrt de sau ath ramat en nautada e barraments. Pirineos Drone explique que se trape en tot tramitar un gran volum de sollicituds e documentacion, pr’amor que “non son operacions d’abituda e requerissen estudis de seguretat especifics en zònes de vòl”. Era enterpresa dejà auie realizat pròves similares en Andòrra est’an passat, dauant es dificultats regulatòries trapades en Catalonha. Eth projècte ei vinculat ath Hub d’Innovacion Rural Hèpic, qu’impulse iniciatives en torisme, espòrts, servicis as persones, energia e ramaderia. Entath govèrn dera Val d’Aran, aguest tipe d’accions contribuïssen a “diversificar eth modèl economic e crear naues oportunitats e retorn economic en territòri”. Er usatge de dròns pòt supausar ua alternativa mès segura e economica respècte ath transpòrt tradicionau en elicoptèr en tot perméter atau evitar risqui innecesaris en zònes de dificil accès e contribusint atau ara sostenilibitat e modernizacion der entorn rurau.