Mès de 40 scientifics analizen eth futur deth permafròst ena Val

Aran ei aguesti dies er epicentre der estudi des mejans heiredi periglacièrs damb era celebracion deth VIII Congreso Ibérico de Permafrost, qu’amasse a mès de 40 scientifics procedenti principaument dera Peninsula Iberica, mès tanben de païsi coma Suècia, Turquia e Canadà.

Eth certamen, qu’arrinquèc eth dijaus, a compdat damb un complèt programa d’activitats, en tot includir projeccions de documentaus, conferéncies e collòquis divulgatius. Entre es ahèrs tractadi destaquen es procèssi biofisics e eth modelat deth relèu en entorns heiredi, atau coma es efèctes deth cambi climatic sus aguesti ecosistèmes.

Pendent eth congrès, era màger part des participaires an presentat es sues investigacions autant en ponéncies oraus coma a trauès d’exposicions damb tèxtes e imatges, en tot compartir es darrèri auanci ena matèria. Eth congrès concludirà aué damb ua excursion scientifica, guidada peth doctor Marcelo Fernandes e Jordi Gavaldà, responsable deth Centre de Lauègi.